Мана, юртимиз ҳурриятига ҳам ўттиз тўрт йил тўлмоқда. Бугун ҳар бир хонадон, ҳар бир маҳалла, ҳар бир туману шаҳар ҳаёти фаровону файзли. Негаки, барча соҳалардаги эмин-эркинлик одамларнинг кўнглига мунавварлик, орзу ниятларига қанот бағишлаётир, кучларига куч, ғайратларига ғайрат қўшаётир. Ахир:
Кечанинг ишидан нурафшон бугун,
Эртага пойдевор, бугунги ҳар иш.
Ҳалол меҳнат билан ризқимиз бутун,
Ризқи бутун юртда чирой, оройиш.
Президентимиз Шавкат Мирзиёевнинг 2025 йил 10 июлдаги "Ўзбекистон Республикаси давлат мустақиллигининг ўттиз тўрт йиллик байрамига тайёргарлик кўриш ва уни ўтказиш тўғрисида"ги қарори каттаю-кичикни янада руҳлантириб юборган. Қарорда таъкидланганидек: " Дунёдаги ҳар бир давлатнинг миллий суверенитети халқаро ҳуқуқ субъекти сифатида жаҳон ҳамжамиятидан муносиб ўрин эгаллаши, ўз халқининг тинч ва фаровон ҳаётини, унинг энг муҳим манфаатларини таъминлашга хизмат қиладиган мустаҳкам сиёсий-ижтимоий замин ва куч-қудрат манбаидир". Демак, истиқлолимизнинг қадрига ҳамиша етишимиз, уни кўз қорачиғидек асрашимиз шарт.
Мустақиллик, аввало, Ватан, миллат, халқ манфаатларини ҳимоялайди, устувор тутади. Бу йилги байрамнинг эзгу ғояси "Ватан учун, миллат учун, халқ учун!" деб белгиланиши ана шундан.
Қаёққа қарамайлик, ҳар куни янгилик: кимдир уй тўйи учун элга дастурхон ёзмоқда, кимдир қизини узатяпти, ўғлини уйлантиряпти, кимдир енгил автомобиль соҳибига айланяпти. Ота-оналар мактабга болаларини тайёрлашяпти. Олий билим даргоҳларига муваффақиятли имтиҳон топшириб, юксак орзулари ушалганидан мамнун ва масрур ўғил-қизларнинг шодликлари бир олам. Қўлига диплом олиб, илк бор иш бошлаётган ўқитувчи, врач, муҳандис каби ёш мутахассисларнинг қутлуғ қадамидан меҳнат жамоалари хушнуд. Истиқлол ислоҳотларидан барча жабҳаларда беқиёс ўзгаришлар юзага келган ва янада такомил топиб бормоқда. Фикримизни биргина тиббиёт соҳасидаги ютуқларнинг ўзиёқ яққол тасдиқлайди. Мухтасар қилиб айтсак:
– Тез тиббий ёрдамга илгарилари эътирозлар муттасил тушаверган бўлса, эндиликда унинг ижобий ўзгаришлари эътирофи кўпдан-кўп;
– Шошилинч тиббий ёрдамнинг имкониятлари беҳад кенгайтирилди;
– Оилавий поликлиника ҳамда оилавий шифокорлик пунктлари фаолияти аҳолининг бирламчи тизим хизматига эҳтиёжини тўла қондиришга йўналтирилган;
– Тиббиётнинг хирургия, кардиология, онкология, эндокринология, нефрология, офтальмология, урология ва бошқа ихтисослаштирилган тармоқларида беқиёс ўзгаришлар амалга оширилмоқда;
– Соғлиқни сақлаш тизими рақамлаштирилди, интернет тармоқларидан самарали фойдаланиляпти;
– Маҳаллабай ишлаш жорий этилди, касалликларни эрта аниқлаш, эрта даволаш беморларни соғайтиришнинг энг мақбул, энг муваффақиятли усули сифатида муҳим аҳамиятга эгалиги бугунги юқори натижадорликда кўринмоқда;
– Янги Ўзбекистоннинг тиббий тизимида хусусий секторнинг ўрни тобора кенгайиб ва мустаҳкамланиб бормоқда.
Бугун биз мустақиллигимизнинг ўттиз тўрт йиллигини соғлом халқимиз куч-қудрати тобора ошиб, Янги Ўзбекистонни бунёд этишдаги жўшқин ҳаракати авж паллага чиққан бир даврда нишонламоқдамиз. Бу эса кўнгилларимизда чексиз фахру ғурур уйғотаверади.
