Вилоятимизда ҳам юртдошларимизга кўрсатилаётган тиббий хизмат самарадорлигини ошириш чоралари кўрилмоқда. Аввало, бирламчи тизим ишини янги босқичга кўтариш, тиббий хизматни бевосита аҳолига яқинлаштириш, хусусан соғломлаштириш ишлари натижадорлигини ошириш чоралари кўрилмоқда.

Бу ўринда ҳудудларда ташкилланаётган тиббий кўриклар ижобий натижа бермоқда. Яқинда Янги Наманган тумани "Соҳил" маҳалласида истиқомат қилувчиларга қулайлик яратилди. Вилоятнинг тажрибали шифокорлари 16-оила поликлиникасидаги ҳамкасблари билан ҳамкорликда маҳалланинг ўзида чуқурлаштирилган тиббий кўрик ташкилладилар.

Бир ҳафта давом этган тиббий жараён туфайли маҳалла аҳли малакали тиббий хизматдан баҳраманд бўлди.

– Маҳаллада яшовчиларнинг бешдан бир қисми ҳафта давомида шифокорлар кўригидан ўтди. Вилоятимизнинг таниқли жарроҳлари, эндокринологлари, тор соҳа мутахассислари қабулида бўлдилар. 418 кишида турли хасталиклар мавжудлиги аниқланди. Улар ҳақидаги маълумотлар DMED тизимига киритилди. Айни пайтда беморларни соғломлаштириш чоралари кўрилмоқда, – дейди 16-оила поликлиникаси бош врачи Дилшоджон Акбаралиев.

Суратларда: тиббий тадбирдан лавҳалар.