Марказ бинолари 1914 йилда қуриб, фойдаланишга топширилган. Шифохона ҳозирда жами 395 ўринли стационар бўлимлар, 100 қатнов қувватига эга поликлиникадан иборат. Марказда 14 та даволаш бўлими ҳамда ёрдамчи бўлимлар фаолият юритиб келмоқда.
2025 йил инвестиция дастурига асосан учта бинодан иборат 185 ўринли даволаш бўлимларини таъмирлаш учун 18,5 миллиард сўм маблағ ажратилган бўлиб, пудратчи томонидан таъмирлаш ишларига киришилди.
Шунингдек, 1-бино 2 қаватли, 35 ўринли жарроҳлик ва 40 ўринли урология бўлими ҳамда 2-бино 1 қаватли 35 ўринли гастроэнтрология бўлими бинолари ҳолати қониқарсизлигини инобатга олиб, ушбу биноларни капитал таъмирлаш иқтисодий жиҳатдан ноъмақбул бўлганлиги сабабли улар ўрнида янги, замонавий, барча қулайликларга эга, юқори технологик жарроҳлик муолажаларини амалга ошириш имконини берувчи 9 қаватли янги бино қуриш мақсадга мувофиқлиги эътироф этилди.
Янги қуриладиган бинода тиббиёт кластери яратилиши кўзда тутилмоқда, бу билан ўз навбатида чет давлатларда амалга оширилаётган мураккаб буйрак ва жигар трансплантацияси амалиётларини юқори малакали чет эл мутахассисларини жалб этган ҳолда ўтказиш имконияти яратилади. Шунингдек, барча юқори технологик операцияларни марказнинг ўзида, пойтахтга бормаган ҳолда амалга ошириш имкони туғилади. Бунинг натижасида беморларга қулай, сифатли тиббий хизмат кўрсатилишига эришилади.
Наманган вилояти ҳокими Шавкатжон Абдураззоқов ўрганишлари чоғида ушбу лойиҳа билан яқиндан танишди. Жараённи тезлатиш ва белгиланган муддатларда фойдаланишга топшириш юзасидан мутасаддиларга топшириқлар берди.
Наманган вилояти ҳокимлиги Ахборот хизмати.
