Наманган вилояти соғлиқни сақлаш бошқармаси бошлиғи
Абдулҳоди Иминовнинг аҳоли ва соҳа ходимларига
М У Р О Ж А А Т И
Ҳурматли ҳамкасблар! Азиз юртдошлар!
Коррупция – тараққиёт кушандаси, давлат ва жамият учун жиддий хатардир. Шу боис юртимизда барча соҳалар қатори соғлиқни сақлаш тизимида ҳам бу иллатга қарши кескин ва муросасиз курашиш, турли бюрократик ҳамда инсон омили билан боғлиқ ҳолатларга барҳам беришга қаратилган кенг кўламли чора-тадбирлар амалга ошириляпти.
Дарҳақиқат, омманинг фаол иштироки ва ҳамюртларимиз кўмагисиз ушбу мақсад ва марраларга эришиш, тиббиётни коррупциядан холи, тўлақонли халқчил тизимга айлантириш қийин. Якдиллик, ҳамжиҳатлик билан бу йўналишдаги саъй-ҳаракатларимизни бирлаштириш ва ўзаро ҳамкорликда ўз ечимини кутаётган оғриқли муаммоларимизни елкама-елка туриб, самарали ҳал этишда Сизларнинг мададингиз жуда зарурдир!
Президентимиз Шавкат Мирзиёев таъкидлаганларидек: "Коррупцияга қарши курашиш умуммиллий вазифа, ҳар бир ватанпарвар юртдошимизнинг виждон иши. Коррупцияга "жамият танасидаги саратон" сифатида қараш керак".
Аммо, афсуски, ҳали ҳам соғлиқни сақлаш муассасаларида коррупция, бюрократия, таъмагирлик, манфаатлар тўқнашуви каби айрим салбий ҳолатлар сақланиб қоляпти. Бу эса, тизимдаги ислоҳотлар самарадорлигига путур етказиб, халқимизнинг тиббиётга, фидойи мутахассисларимиз меҳнатига бўлган ишончини заифлаштирмоқда.
Ана шу ҳолатлардан келиб чиқиб, тизимда коррупцияга қарши курашишнинг замонавий механизмларини кенг жорий этишга алоҳида эътибор қаратяпмиз. Соҳа фаолиятида очиқликни таъминлаш, жамоатчилик олдида ҳисобдорликни ошириш бўйича зарур чоралар кўрилмоқда.
Хусусан, қисқа вақт ичида қатор электрон модулларни ўзида жамлаган Ягона тиббиёт ахборот тизими (DMED) яратилиб, амалиётга татбиқ этилмоқда. Шунингдек, "Ситуацион марказ" ташкил қилиниши соҳада бюджет маблағларининг мақсадсиз сарфланиши ҳамда коррупция ҳолатларини барвақт аниқлаш ва олдини олишга хизмат қилаётгани билан аҳамиятлидир.
Ўз навбатида, соҳа раҳбар-кадрлари бугунги кун талабларидан келиб чиқиб, замонавий менежмент асослари бўйича ўқитилмоқда. Тиббиёт муассасалари ҳисобчиларининг молиявий билим ва кўникмаларини ошириш бўйича ўқув курслари ташкил қилиняпти.
Албатта, бу ҳали етарли эмас. Олдинда ўз ечимини кутаётган муаммолар, давлатимиз раҳбари олдимизга қўйган талаб ва вазифалар кўп. Буни тўлақонли уддалаш учун бутун юртдошларимиз бирлашиб курашиши зарур. Шундан келиб чиқиб, биз коррупцияга қарши курашишда кучли жамоатчилик назоратини ўрнатишни муҳим мезон, деб биламиз.
Ҳурматли фуқаролар!
ВССБ маъмурияти, шаҳар ва туманлар тиббиёт бирлашмалари, вилоят даволаш-профилактика муассасалари ходимларининг коррупциявий хатти-ҳаракатларига гувоҳ бўлсангиз ёки қонунчиликка зид бошқа ҳуқуқбузарлик ҳолатларига алоқадорлиги юзасидан маълумотга эга бўлсангиз, 69-234-32-18 ва 69-234-33-64 "Ишонч телефони" орқали ўз мурожаатингизни йўллашингиз мумкин. Ҳар бир мурожаат бошқарма раҳбарияти томонидан зудлик билан ўрганиб чиқилади ва зарур амалий чоралар кўрилади.
