Ўзбекистон Республикаси Президентининг "Соғлиқни сақлаш соҳасини комплекс ривожлантиришга доир қўшимча чора-тадбирлар тўғрисида"ги (ПҚ-5124. 2021йил 25 май) ҳамда "Оналар ва болалар саломатлигини муҳофаза қилиш, аҳолининг репродуктив саломатлигини мустаҳкамлаш чора-тадбирлари тўғрисида"ги (ПҚ-296. 2023 йил 8 сентябрь) қарорлари ижроси юзасидан вилоятимизда РИО ва БСИАТМ Наманган филиали мутахассислари томонидан "Соғлом ҳомиладорлик – соғлом келажак" акцияси ўтказила бошланди.
Бундан мақсад ҳомиладорлик давридаги касалликларни барвақт аниқлаш, даво чораларини кўриш ва соғлом фарзандлар туғилишига эришишдан иборат.
Акция давомида филиалнинг малакали акушер-гинекологлари томонидан вилоятнинг барча ҳудудидаги хавф гуруҳига кирувчи ҳомиладор аёллар қамраб олинади ҳамда уларга зарур тиббий ёрдамлар кўрсатилади.
Тадбир Наманган шаҳар кўп тармоқли марказий поликлиникасидан бошланди. Бу ерда кўрик учун зарур бўлган кушетка, стетоскоп, тонометр, пульсоксиметр, лента, тарози, УТТ ва бошқа жиҳозлар муҳайё этилди. Патронаж доялар ўз ҳудудидаги хавф гуруҳига мансуб ҳомиладорларнинг иштирокини таъминладилар.
– Шаҳар ҳудудида яшовчи ҳомиладорлик ташхиси билан назоратга олинганлар 5176 нафар, – дейди вилоят лидер дояси Нодира Ҳусанбоева. – Уларнинг ҳар бири бириктирилган патронажлар назоратида. Бугунги акцияга эса ҳомиладорлик қийин кечаётган оналар тўла жалб этилган. Филиалнинг юқори малакали мутахассислари улардаги хавф омилларини аниқлаб, зарур муолажалар белгилашмоқда.
Филиал директори Райҳона Даминова, тажрибали акушер-гинекологлар Фотима Қаюмова, Нилуфар Қаюмова, Шаҳноза Ботирова, УТТ врачи Камола Қаҳҳорова ва бошқалар ўтказаётган чуқурлаштирилган тиббий кўрик туфайли ўнлаб ҳомиладорлардаги касалликлар барвақт аниқланмоқда. Айни пайтда тегишли муолажалар белгилаб, стационар, амбулатор даволанишга йўналтириляпти.
– Ҳомиладорликка мутлақ ва нисбий монеълиги бўлган аёлларга алоҳида эътибор қаратилмоқда, – дейди акушер-гинеколог Фотима Қаюмова. – Чунки бу тоифага кирувчиларда ҳомиладорлик муаммолари бошқаларга қараганда ҳам мураккаб ва жиддий оқибатларга олиб келиши мумкин. Бу хилдаги беморлар бир неча кун қатъий назорат остида бўлишлари ва даволанишлари учун шаҳар шифохоналари ҳамда филиалга ётқизилмоқда. Қолганларга эса амбулатор муолажалар белгиланяпти.
Меҳр ва эътибор, беминнат тиббий хизматдан аёллар қувончининг чеки йўқ. Улар она ва бола саломатлиги учун тинмай қайғураётган Президентимиз, фидойи шифокорлардан беҳад миннатдорликларини изҳор этмоқдалар.
20 августгача вилоятнинг барча туманларида амалга ошириладиган акция минглаб ҳомиладорлар саломатлиги яхшиланиши ва фарзандлари соғ-омон дунёга келишини таъминлашда муҳим аҳамият касб этади.
Муҳаммад ОБИЛОВ.
