Президентимиз томонидан тиббиётда бошқарувнинг янги моделини жорий этиш бўйича белгилаб берилган вазифалар изчил бажарилмоқда. Тажриба-синов лойиҳаси доирасида туман тиббиёт бирлашмаси негизида туман соғлиқни сақлаш бўлими ташкил этилди. Бирламчи тиббий-санитария ёрдами тизимида оилавий поликлиникалар, оилавий шифокорлик пунктлари, шу жумладан, уларга филиал сифатида бириктирилган муассасалар ва маҳалла тиббий пунктлари аҳоли сонидан келиб чиқиб, юридик шахс мақомига эга оилавий поликлиникалар ва уларнинг филиалларига айлантирилди. Оилавий поликлиникаларда аҳолига тиббий ёрдам кўрсатувчи оилавий шифокор ҳамда иккинчи тип оилавий поликлиникаларда қўшимча педиатр, акушер-гинеколог ва диагностика мутахассисларининг хизматлари, шунингдек, стоматологик хизматлар аутсорсинг асосида кўрсатилади, оилавий поликлиникалар зарур тиббий жиҳозлар билан таъминланмоқда. Шунингдек, янги моделга кўра, оилавий поликлиникаларда тиббиёт ходимлари фақат тўлиқ ставкада фаолият юритади. Тўрт босқичли махсус оилавий соғлиқ дастури асосида тиббий бригадалар ходимлари малакасини ошириш чоралари кўрилмоқда.

Бугунги кунда Чортоқ туманида жами 56 та тиббиёт муассасаси фаолият олиб бормоқда. Уларнинг 20 таси бирламчи тиббий-санитария муассасалари – оилавий поликлиникалар, 1 та туман марказий шифохонаси, 3 та ҳудудий бўлимлар ҳамда 32 та хусусий тиббиёт муассасалари ҳисобланади.

– Бошқарувнинг янги моделини жорий қилишда, – дейди туман соғ­лиқни сақлаш бўлими мудири Қобилжон Маҳмудов, – вилоятдаги ҳамкасбларимиз бизга жуда катта ёрдам қўлини чўзишди. Соғ­лиқни сақлаш бошқармаси топшириғига асосан, туманимиздаги 57 та маҳалла фуқаролар йиғинларига, КТМП, 5 та оилавий поликлиника ва 12 та оилавий шифокорлик пунктларига ихтисослаштирилган марказлар вилоят филиалларининг раҳбар ва масъул ходимлари, туман ва шаҳар марказий шифохоналарининг бўлим мудирлари, катта ҳамширалари ҳамда малакали ҳамширалари амалий ёрдам кўрсатишмоқда. Қисқа муддат ичида 219 минг нафардан зиёд аҳоли хатловдан ўтказилди. Маълумотлар DMED тизимига тўлиқ киритилди.

Ҳозирги кунга қадар 174 дона компьютер-моноблок, 44 дона планшет, 20 дона "Smart" телевизор қурилмаси, 118 дона турли функ­цияли принтерлар, 25 дона сканер, 34 дона веб-камера, 2 дона архив файл учун автоматик сканер, 21 дона switch (коммутатор) сотиб олинди. Бундан ташқари, 20 дона инфокиоск харид қилиш учун электрон савдо биржаси орқали шартнома тузилди.

Тажриба-синов лойиҳаси доирасида ҳудудлардаги тиббиёт бригадаларига бириктирилган аҳоли сонидан келиб чиқиб, оилавий поликлиника филиаллари, 1– ва 2-тип оилавий поликлиникаларга айлантирилди. 3000 нафаргача аҳолига оилавий поликлиника филиали, 3001-12000 нафаргача аҳолига 1-тип оилавий поликлиника, 12001-51000 нафаргача бўлган аҳолига 2-тип оилавий поликлиника тиббий хизмат кўрсатади. Мана шу меъёрларга асосланиб, туман бўйича 11 та 1-тип ҳамда 9-та 2-тип оилавий поликлиникалар шакллантирилди.

Намуна сифатида танлаб олинган ва янги ташкилланган 13-оилавий поликлиника туманнинг Қорабоғ маҳалла фуқаролар йиғинида жойлашган. Аҳоли сони 4530 тани ташкил этади. Поликлиникада белгиланган талаблар асосида қурилиш-таъмирлаш ва жиҳозлаш ишлари амалга оширилган. Махсус ташкил этилган йўлакчалар орқали ногиронлиги бўлган шахслар ҳеч бир қийинчиликсиз ҳаракатланишлари мумкин. Сариқ рангга бўялган ва кўзи ожизлар учун яратилган йўлакчалар ҳам беморларни рўйхатхона, бошқа зарур мутахассислар хоналарига йўналтиради. Ҳожатхоналар ва қўл ювиш хоналарида ҳам ногиронлик аравачалари ҳаракати учун қулайлик яратилган. Она ва бола хонаси ёруғ ва шинам, бу ерда ҳам барча жиҳозлар мавжуд.

– Фуқаролар электрон навбат орқали қабул қилинмоқда, – дейди амалиётчи ҳамшира Ҳабибахон Тур­ғунова. – Хатлов жараёнида барча маълумотлар DMED тизимига киритилганлиги сабабли, беморни шифокорга йўналтириш осон кечмоқда. Фуқаронинг ЖШИР рақамини компьютерга киритишимиз биланоқ, у хақдаги барча маълумотлар нафақат бирламчи тизимда, балки вилоят ёки республика миқёсидаги шифохоналарда ҳам намоён бўлади. Энди бемор республика ёки вилоятдаги клиникаларга мурожаат қилган тақдирда ҳам (касаллик тарихидан кўчирма, биокимёвий таҳлиллар ва ҳоказо) ортиқча қоғозларни ўзи билан кўтариб юрмайди.

Жумладан, айни пайтда туманда тиббиёт бригадаси ҳамда унга бириктирилган аҳоли ўртасида ҳуқуқ ва мажбуриятларни белгиловчи икки томонлама шартнома тузилмоқда. Аҳоли оилавий шифокорни эркин танлаяпти, бу жараёнларга хусусий оилавий шифокорлар ҳам жалб этилмоқда. Бу ўз навбатида, фуқароларнинг сифатли тиббий хизматдан фойдаланиши ва саломатлигини мустаҳкамлашга замин яратмоқда.

Хулоса сифатида айтишимиз мумкинки, Чортоқ туманида амалга оширилаётган ислоҳотлар яқин орада ўзининг самарали натижасини кўрсатса, ажаб эмас.

Манзура ЭРГАШЕВА.