ТИББИЁТДА ЯНГИ ИСЛОҲОТЛАР

Чортоқ туманида соғлиқни сақлашнинг янги модели жорий этилмоқда. Унда аҳоли учун қандай қулайликлар мавжуд?

Ўзбекистон Республикаси Президентининг жорий йил 19 майдаги "Республикада соғлиқни сақлаш тизимини ва аҳолига тиббий хизмат кўрсатиш тамо­йил­ларини такомиллаштириш орқали соҳани ислоҳ қилишни изчил давом эттириш чора-тадбирлари тўғрисида"ги ПФ-88-сон Фармонига мувофиқ тажриба-синов лойиҳаси сифатида тизимни ташкил этишнинг янги модели 2025 йил 1 июлдан бошлаб Республиканинг муайян туман ва шаҳарларида, хусусан, Наманган вилоятининг Чортоқ туманида жорий этилмоқда.

Эътиборлиси, жорий йилнинг 1 июнидан мамлакатимизда "Тиббиётда 90 кунлик ўзгаришлар вақти" дастури ижросига киришилди. Соғлиқни сақлашнинг янги моделини жорий қилиш бўйича бошланган тажриба-синов лойиҳаси бўйича Чортоқ туманида ҳам бир қатор ишлар амалга оширилди.

Танлаб олинган ҳудуддаги тиббиёт муассасаларида ҳаракатланиш учун зарур шарт-шароитлар яратилди.

Ногиронлиги бўлган шахслар учун махсус йўлаклар ташкил қилинди. Она ва бола хонаси, аҳоли учун қулай рўйхатхона ва кутиш залларини ташкил этиш, DMED тизимидан самарали фойдаланиш ҳамда тиббий хизмат кўрсатиш сифатини яхшилаш, шунингдек, шахсий гигиена қоидаларига риоя этилиши бў­йича керакли чоралар кўрилди.

Айни пайтда Чортоқ туманида жорий этилаётган ислоҳотларга вилоятдаги даволаш-профилактика муассасалари тиббий бригадалари ҳам жалб қилинган.

Республика ихтисослаштирилган кардиология илмий-амалий тиббиёт маркази Наманган филиали шифокор ва ҳамширалари эрта тонгдан 55-оилавий поликлиникада ҳозир бўлишди. Улар DMED тизимида бригадаларни шакллантириш бўйича ҳамкасбларига ёрдам бердилар.

Шунингдек, марказ ходимлари Балиқликўл маҳалла фуқаролар йиғинига қарашли кўчаларда хонадонма-хонадон юриб, янги моделда белгиланган ҳужжат тиббиёт бригадаси ва аҳоли ўртасида келишув (битим) тузиш ишларини ҳам амалга оширдилар.

– Янги қоидаларга кўра тиббиёт бригадаси ва унга бириктирилган аҳоли ўртасида томонларнинг ҳуқуқ ва мажбуриятларини белгилайдиган келишув тузилади, – дейди РИКИАТМ НФ бош врачи Воҳид Турдиев. – Келишувда тиббиёт бригадасининг вазифалари тўлақонли белгиланган, шунингдек, фуқаронинг ҳам ҳуқуқ ва мажбуриятлари қайд этилган бўлиб, мазкур битим аҳолининг сифатли тиббий хизмат олишини кафолатлайди. Яна бир муҳим томони фуқаро шифокорни танлаш ҳуқуқига эга бўлади.

– Тез-тез қон босимим ошиб туради, – дейди Балиқликўл кўчаси, 17-уйда яшовчи Гулнора ая Ҳамроева. – Келишув шартномаси билан патронаж ҳамшира ёрдамида танишиб чиқдим. Мен учун жуда қулай томонлари бор экан, Давлат тиббий суғурта жам­ғармаси томонидан саломатликни тиклаш, тиббий кўрикдан ўтиш учун бепул пакетларнинг берилиши менга жуда ёқди. Сабаби, баъзан шароит бўлмаганлиги туфайли ўз вақтида шифохонада даволана олмас эдим, битимга кўра, белгиланган муддатда оила шифокоримга мурожаат қилиб, даволанишим учун бепул дори-дармонлар билан таъминланишим мумкин экан.

Дарҳақиқат, соғлиқни сақлашнинг янги моделини жорий қилиш бўйича тажриба-синов лойиҳаси бўйича Вазирлар Маҳкамасининг шу йил 20 июндаги "Республикада аҳолига бирламчи тиббий-санитария ёрдамини кўрсатиш тизимини такомиллаштириш бўйича тажриба-синов лойиҳасини амалга ошириш чора-тадбирлари тўғрисида" 384-сонли қарори қабул қилинган. Тажриба-синов тариқасида жорий қилинаётган янги тизим бир қатор қулайликлари билан аҳолини мамнун этмоқда. Ислоҳотлар ва ўзгаришларнинг барча ҳудудларда тўлақонли амалга оширилиши билан халқимизда тиббий хизматдан розилик ҳисси ҳам кучайиб бораверади.

Манзура ЭРГАШЕВА.