Президентимизнинг "Республикада соғлиқни сақлаш тизимини ва аҳолига тиббий хизмат кўрсатиш тамойилларини такомиллаштириш орқали соҳани ислоҳ қилишни изчил давом эттириш чора-тадбирлари тўғрисида"ги ПФ-88-сонли Фармони ҳамда "Соғлиқни сақлаш тизимидаги ислоҳотларни амалга оширишнинг қўшимча чора-тадбирлари тўғрисида"ги ПҚ-185-сонли Қарорида белгиланган долзарб вазифалар ижроси юзасидан тажриба-синов объекти бўлган Чортоқ туманида тиббиёт тизимини янги моделда ташкил этиш ишлари жадал давом эттирилмоқда.

Ислоҳот доирасида тўла ставка тизимини жорий этиш жараёнларида янги иш ўринларига эҳтиёж туғилган тиббиёт ходимлари учун вилоятнинг ихтисослаштирилган тиббиёт муассасалари, Чортоқ тумани соғлиқни сақлаш бўлими ҳамда хусусий шифохоналарнинг раҳбар ва мутахассислари иштирокида "Меҳнат ярмаркаси" ташкил этилди. Ташриф буюрган 146 нафар тиббиёт ходимига давлат муассасалари томонидан 72 та, хусусий сектор вакиллари томонидан 175 та бўш иш жойлари ҳавола қилинди.

– Меҳнат ярмаркаси севимли касбимизни давом эттириш имконини берди, – дейди Нурхон Саидова. – Мен Ҳазратишода жойлашган 20-оилавий поликлиника рўйхатхонасига, дугонам Раънохон умумий амалиёт ҳамширалигига, Нафисахон эса муассасанинг ҳудудий филиалига ишга қабул қилиндик.

– Орзуим вилоят перинатал марказида ишлаш эди, – дейди Наргиза Ҳамдамова. – Ярмарка орзуимга етказди. Ҳомиладорларни даволаш бўлими доялигига ишга кирдим.

Тадбир давомида "Сайёр қабул" ҳам ташкил этилди. Бошқарма бошлиғи Абдулҳоди Иминов ва бош мутахассислар томонидан 53 кишининг мурожаатлари тингланиб, қонунчилик доирасида ҳал қилинди. Хусусан, уларга ҳавола қилинаётган янги иш ўринлари тўла ставкадан иборатлиги, бу эса фаолият сифат ва самарадорлиги-ю, манфаатдорликларини ошириши, айни пайтда билим ва малака, касбий салоҳиятларини муносиб даражада такомиллаштиришлари лозимлиги юзасидан зарур тушунча ва масалаҳатлар берилди.

"Меҳнат ярмаркаси" натижаларига кўра, 27 нафар тиббиёт ходими ишлаш истагини билдирди. Уларнинг 9 нафарини вилоят, 14 нафарини туман, 4 нафарини хусусий шифохоналарга ишга жойлаштиришга оид тегишли расмий жараёнлар амалга оширилмоқда.

Муҳаммад ОБИЛОВ,

"Шифокор ва ҳаёт" мухбири.