РШТЁИМ Наманган вилояти филиали мажлислар залида соғлиқни сақлаш бошқармаси тизими даволаш-профилактика муассасаларида коррупцияга қарши кураш ва унинг олдини олиш бўйича амалга оширилаётган ишлар муҳокамасига бағишланган йиғилиш бўлиб ўтди. Унга вилоят шифохоналари, шаҳар, туман тиббиёт бирлашмаларининг раҳбарлари, кадрлар бўйича мутахассислари, ҳисобчилари таклиф этилди. Мажлисни бошқарма бошлиғи Абдулҳоди Иминов очиб, тизимни коррупциядан тозалашга қаратилган изчил чора-тадбирлар, мавжуд муаммолар, галдаги долзарб вазифаларга тўхталди.
Вилоят прокурорининг ўринбосари Абдулбосит Нурматов ўз маърузасида вилоят соғлиқни сақлаш тизимидаги коррупциявий ҳолатлар, уларнинг келиб чиқиши сабаб ва оқибатларини мисоллар асосида чуқур таҳлил этди.
Маъруза юзасидан бўлиб ўтган музокараларда айрим тиббиёт муассасаларида юз бераётган таъмагирлик, порахўрлик, талон-тарож, ўзлаштириш, манфаатлар тўқнашуви, давлат харидларида қонунбузилишларга йўл қўйилаётгани учун мутасаддилардан қаттиқ масъулият талаб этилди.
Йиғилишда танқидий-таҳлилий маърузадан келиб чиққан ҳолда Президентимизнинг 2025 йил 19 майдаги 88-сонли Фармонида белгиланган вазифалар ижроси, бирламчи тиббий-санитария ёрдамини такомиллаштириш, ахборот технологияларини жорий этиш ва "Коррупциясиз соҳа" лойиҳасини амалга ошириш, бюджет маблағларининг мақсадсиз сарфланиши ҳамда коррупцион ҳаракатларни барвақт аниқлаш ва олдини олишга қаратилган таклиф-мулоҳазалар билдирилди.
Шунингдек, кўрсатилаётган тиббий хизматлар сифатини ошириш, бошқарув жараёнидаги ортиқча тартиб-таомилларни қисқартириш ҳамда ноқонуний хатти-ҳаракатларга чек қўйишга хизмат қилувчи рақамлаштириш ва "Электрон соғлиқни сақлаш" ахборот тизимларининг ягона комплекси бўлган DMED ахборот тизимини мукаммал жорий этиш, аҳолига тиббий хизмат кўрсатиш ва ишга қабул қилиш билан боғлиқ айрим коррупциявий ҳолатларни барҳам топтириш йўл-йўриқлари белгиланди.
Мутасаддиларга коррупцияга қарши чора-тадбирларни янада кучайтириш, мавжуд камчиликларни бартараф этиш, кадрларни ишга қабул қилишда шаффофликни таъминлаш ҳамда барча даражадаги тиббиёт муассасалари раҳбарларида менежментлик салоҳиятини ошириш, нодавлат шифохоналарда тиббий меъёрларга амал қилинишига эътибор қаратиш ва уларда ишловчи кадрлар салоҳиятини ошириш, муассасалар фаолиятига нисбатан жамоатчилик назоратини кучайтириш бўйича аниқ вазифалар юклатилди.
Муҳаммад ОБИЛОВ,
"Шифокор ва ҳаёт" мухбири.
