Аъзамжон БОТИРОВ,

Наманган вилояти соғлиқни сақлаш бошқармаси

            бошлиғининг биринчи ўринбосари

"Инсон қадри учун". Мамлакатимиз тиббиёти ана шу маслак ва мақсад асосида изчил янгиланмоқда. "Тиббиётда 90 кунлик ўзгаришлар вақти" дастури бу борадаги бунёдкорликларга янада жадаллик бахш этди. Мазкур дастур, Юрт­бошимиз таъкидлаганидек: "...тиббиёт муассасасига маданият, тартиб-интизом, файз олиб кириб, одамларга ижобий кайфият улашади".

Президентнинг шу йил 19 майдаги "Республикада соғлиқни сақлаш тизимини ва аҳолига тиббий хизмат кўрсатиш тамойилларини такомиллаштириш орқали соҳани ислоҳ қилишни изчил давом эттириш чора-тадбирлари тўғрисида"ги Фармони ва унинг ижросига қаратилган қарорига биноан ишлаб чиқилган дастурда аниқ вазифа ва мақсадлар белгилаган. Унга биноан, 2025 йил 1 июндан бошлаб тиббиёт муассасаларида аҳоли учун қулай шарт-шароитлар, хизмат кўрсатишнинг замонавий шакллари жорий этиляпти.

Жумладан, вилоятимиздаги мавжуд тиббиёт муассасаларида беморлар учун кутиш заллари ташкил қилиниб, юмшоқ ўриндиқлар билан таъминланяпти. Яқингача аксар поликлиникаларнинг рўйхатхоналарида нажот истаб келганлар тик турганча навбат кутган, тиббий картаси топилгунча азияти кучайган бўлса, эндиликда тамоман акси. Рақамлаштириш туфайли тиббий картани излаш билан вақт йўқотиш, қоғозбозлик сингари ҳолатлар барҳам топмоқда.

Қабулга онлайн ёзилиш имкониятлари кенгайтирилаётгани туфайли бир вақтнинг ўзида ҳаддан ортиқ навбатлар юзага келиши, тиббий хизмат сифатига путур етиши, шифокорларга юклама ортишининг олди олиняпти. Аҳоли, беморлар ва ногиронлар осон ҳаракатланишлари кўзланган ҳолда қаватлар ва коридорларга йўналтирувчи белгилар ўрнатиляпти. Пандуз ва тутқичлар қулайлаштириляпти. Вужудга келаётган ин­клюзив шароит фуқароларнинг руҳий ва жисмоний зўриқиши, норозилик кайфияти ҳосил бўлишига йўл қўймаслик чоралари кўриляпти.

"Она ва бола" хоналари ташкил қилинаётгани эса аёлларнинг тиббий хизматлардан бемалол фойдаланишларига имкон яратади. Бунгача ўзи шифо излаб келган она боласининг хархашасидан бадтар қийналарди.

Хоналар ва йўлаклар тежамкор замонавий ёритиш қурилмалари билан жиҳозланмоқда. Санитария-гигиена хоналари таъмирланиб, шахсий гигиена воситалари билан таъминланяпти. Бу тозаликка риоя қилиш даражасини ошириб, айрим беписанд кишиларни энг зарур тиббий талабни бажаришга йўналтиради.

Шунингдек, тиббий хизматлар сифатини ошириш ҳамда аҳоли ва беморлар учун қулайликлар яратиш имконини берувчи яна кўплаб тадбирлар амалга ошириляпти.

Қолаверса, дастурда тиббиёт ходимлари иш самарадорлигини ошириш, кераксиз, тиббиёт ходимлари-ю аҳоли беҳуда вақт йўқотишига олиб келадиган бюрократик тартиб-қоидаларни қисқартириш жараёнлари изчил давом эттириляпти.

Кўриниб турибдики, мақсад аниқ, вазифалар ҳам. Албатта, уларнинг изчил ижроси соҳа ислоҳотларини янги босқичга кўтаришга замин яратади.