Азалий ва навқирон Наврўз вилоятимизда шоду ҳуррамлик билан нишонланди. Хусусан, вилоят марказидаги "Тинчлик" хиёбони ҳамда Давлатобод туманида жойлашган "Афсоналар водиси" тематик парки чинакам сайлгоҳга айланди.

"Тинчлик" хиёбонига вилоят раҳбарияти, ҳуқуқни муҳофаза этувчи идоралар, ташкилотлар раҳбарлари, нуронийлар, кенг жамоатчилик вакиллари жамландилар. Наманган шаҳридаги маҳаллалар, корхона-ташкилотлар жамоалари ўзига хос кўргазмалар ташкил этдилар. Спортчи-ю, ҳунар­манд­лар, санъаткорлар барчага байрам кайфиятини улашишди.

Тантанали очилиш маросимида Наманган вилояти ҳокими, Ўзбекистон Республикаси Олий Мажлиси Сенати аъзоси Шавкатжон Абдураззоқов вилоят аҳлини байрам билан табриклаб, "Қадриятларинг боқий бўлсин, Наврўз!" деган бош ғоя мазмун-моҳияти, шунингдек, "Атроф-муҳитни асраш ва "яшил" иқтисодиёт йили"да вилоятни ҳар томонлама ривожлантириш бўйича режалаштирилган ишлар ҳақида батафсил тўхталди.

15 нафар шижоатли, фаол, ташаббускор маҳалла тизими вакилларига "Маҳалла ифтихори" кўкрак нишони тантанали равишда топширилди.

Байрам дастури доирасида шаҳардаги кам таъминланган, эҳтиёжманд оилаларнинг 10 нафар фарзандининг хатна тўйи ўтказилди. Тўйболалар ва уларнинг оиласига сов­ғалар берилди. Шунингдек, 10 та қозонда сумалак тайёрланиб, Нав­рўз сайли иштирокчиларига тар­қатилди. Қолаверса, Наврўзга атаб тайёрланган 20 метрлик варрак, 25 килограммлик патир нон намойиши барчада катта қизиқиш уйғотди.

Юртдошларимиз Давлат­обод туманидаги "Афсоналар водийси" тематик паркида ташкил этилган байрам тадбирларидан олам-олам завқ-шавқ олдилар.

Наманган вилояти ҳокимлиги

Ахборот хизмати.