Поликлиникаларда, айниқса, тушгача одам кўп бўлади. Кирганларнинг аксари беморлар ва уларнинг ҳамроҳлари билан гавжум вазиятда кимга мурожаат қилиши, қайси хонага кириши, қайси врачга учрашини аниқлагунча анча вақти ўтади, асабийлашади. Шундай кезда ташриф буюрувчиларни йўналтириб турувчи ходимнинг бўлиши зиддиятларнинг олдини олади.
Узоқ йиллардан бери Наманган шаҳар кўп тармоқли марказий поликлиникасида шу тажриба қўлланилади. Кираверишда ҳамшира пешвоз туради. Келганларни хушмуомала билан кутиб олиб, мақсадини англагач, рўйхат бўлими ва керакли хоналарга йўналтиради, нуроний, ногиронлиги бор, ҳомиладорларни тегишли мутахассис турган хонага ўзи кузатиб қўяди ёки ўша йўналишдаги ҳамкасбига бириктиради. Шу боис бирорта муаммо туғилмайди.
Ўтган йили Татаристон тиббиёт муассасаларига борган тошкентлик ҳамкасбларимиз ана шу тажриба янада такомиллашган шаклда, тиббий менежерлар фаолияти тарзида йўлга қўйилганлигининг гувоҳи бўлдилар. Сўнгра мазкур усул пойтахт поликлиникаларида жорий этилди.
Яқин вақт ичида мамлакатимиз бирламчи тиббий-санитария ёрдами муассасаларига татбиқ қилиниши кўзда тутилган. Бунга эса Президентимизнинг давлат тиббий суғуртаси тизимига ўтишга оид қарорлари асосида туман тиббиёт бирлашмаси раҳбарига, ҳудуддаги ҳолатдан келиб-чиқиб, янги штат бирликларини тасдиқлаш ваколати берилиши имкон яратади.
Аҳамиятлиси, тиббий менежерлар ҳамширалар орасидан тайинланади. Улар мулоқот одоби, тиббий идроки, сезгирлиги, психологик қобилияти ва тил билишига қараб танланади. Ходим муассасага келган фуқароларни электрон навбат олишларига, кекса ва ёрдамга муҳтож кишиларнинг керакли врач ва бошқа мутахассислар хонасини сарсонгарчиликсиз топиб олишига кўмаклашади. Натижада беморнинг тиббиёт муассасасидаги муаммоси тез ва кўнглидагидай ечим топади, эҳтимолий гина-кудуратлар олди олинади, қадр-қимматдан кўнгиллари хушланади. Бу эса мурожаатчилар қанча кўп бўлса ҳам ишни осойишта ташкил этиш, ташхислаш ва даволаш самарадорлигининг муҳим омили бўлади.
Техникумимизда мутахассислик фанлари чуқур ўқитилиши билан бирга бўлғуси ҳамшираларда тиббий менежерликка хос сифатларни камол топтиришга ҳам жиддий эътибор қаратилмоқда. Айниқса, гуруҳ раҳбарлари маънавият соатларида мазкур вазифа масъулияти, талаблари ҳақида кенг тушунчалар бериб, тренинглар ҳам уюштирмоқдалар. "Мен менежер бўлсам" мавзуида лойиҳалар, иншолар танловлари ва бошқа тиббий-маърифий тадбирлар режалаштирилган. Зеро, янги вазифа соғлиқни сақлашдаги ислоҳотлар натижадорлигини таъминлашга бевосита боғлиқ экан, талабаларимиз оқилона иш ташкил этиш малакасини ҳозирдан эгаллаб боришлари керак.
Азамат ҚАЮМОВ,
Чортоқ Абу Али ибн Сино номидаги
жамоат саломатлиги техникуми гуруҳ раҳбари.
