Ўзбекистон Республикаси Соғлиқни сақлаш вазири Асилбек Худаяров Наманган вилоятига ташриф буюрди. Дастлаб бир қатор тиббиёт муассасаларида бўлиб, уларнинг моддий-техник базаси, тиббий хизмат кўрсатиш сифати ва кадрлар салоҳиятини ўрганди.
Вазир Наманган шаҳар кўп тармоқли марказий поликлиникаси ҳамда 12-оилавий поликлиникада тиббиёт ходимлари билан учрашиб, уларнинг муаммолари ва таклифларини тинглади. Шунингдек, у соғлиқни сақлаш тизимини янада такомиллаштириш, тиббий хизматларнинг сифатини ошириш ва аҳолига кўрсатилаётган тиббий ёрдамни яхшилаш бўйича ўз тавсияларини берди.
Асилбек Худаяров РШТЁИМ Наманган филиали мажлислар залида вилоят даволаш-профилактика муассасалари раҳбарлари ва Янги Наманган тумани маҳаллалари еттилиги вакиллари билан учрашди.
Аҳолига кўрсатилаётган тиббий хизмат сифатини яхшилаш, айниқса кам таъминланган оилалар, ўзгалар ёрдамига муҳтож инсонларни қўллаб-қувватлаш, улар саломатлигини мустаҳкамлаш масалаларига эътибор қаратилди. Тиббиёт ходимлари ва маҳаллалар фаоллари билан ҳамкорликни кучайтириш орқали хизмат кўрсатиш натижадорлигига эришиш муҳимлиги алоҳида таъкидланди.
Вазир тизим мутасаддиларига ҳам тегишли кўрсатмалар берди. Учрашув қатнашчилари фуқароларнинг ҳақли эътирозларига сабаб бўлаётган айрим муаммоларни рўйи-рост баён этдилар. Кўтарилган масалаларни изчил ҳал этиш чоралари кўриладиган бўлди.
Тадбирда Наманган шаҳар ҳокими Анваржон Отаходжаев иштирок этди.
