Ҳиндистон ва Ўзбекистон давлатларининг тобора кенг кўлам касб этаётган иқтисодий-ижтимоий соҳалардаги ҳамкорликлари соғлиқни сақлаш тизимида ҳам кутилган самаралар бермоқда.

Ҳиндистон давлатининг "MAX – Health Care" клиникасининг профессорлари – жигар кўчириб ўтказиш трансплантологи Гаурав Чаубал, тиббий онколог Девендра Чаукар илмий-амалий тажриба алмашиш мақсадида Наманган вилояти болалар кўп тармоқли тиббиёт марказига ташриф буюришди. Улар ҳамкорликда жигар, буйрак муаммолари, гемоталогик, онкологик хасталиги, туғма мураккаб нуқсони бўлган 50 нафарга яқин болаларни тиббий кўрикдан ўтказиб, ташхис ва даволаш йўл-йўриқларини белгиладилар.

-Қизим Дилноза бурун бўшлиғи ўсимтаси билан Тошкентда мураккаб даво муолажаларини ўтказди,-дейди Аноржон Фозилова. -Тез-тез юқори малакали мутахассисларга кўриниб туришимиз керак эди. Ҳиндистондан номдор онколог таклиф этилгани биз учун ҳам айни муддао бўлди. Хорижлик мутахассис қизимнинг тиббий парвариши бўйича қимматли маслаҳатлар берди.

Маҳорат сабоқлари жараёнида оператив давога муҳтожлар сараланди, жигар трансплантацияси амалиётига тайёргарлик, маҳаллий мутахассисларнинг Ҳиндистонда малака оширишлари юзасидан келишувларга эришилди.