Республика ихтисослаштирилган фтизиатрия ва пульмонология илмий-амалий тиббиёт маркази ташаббуси билан Наманганда водий вилоятлари мутахассислари учун "Ўпканинг носпецифик касалликларини даволашда виброакустик терапия ва ноинвазив ўпка вентиляциясининг аҳамияти" мавзусида ZOOM шаклида халқаро миқёсдаги маҳорат дарслари ўтказилди. Президентимизнинг 2023 йил 20 январь куни қабул қилинган "2023-2026 йилларда фтизиатрия ва пульмонология хизматини янада ривожлантиришга қаратилган чора-тадбирлар тўғрисида"ги ПҚ-12-сонли қарори ижроси доирасида ташкилланган тадбирни РИФПИАТМ директорининг ўринбосарлари Ирина Ливерко ҳамда Хайрулло Ражабов мувофиқлаштириб бордилар.
Иштирокчилар Москва тиббиёт университети пульмонология ва респератор тиббиёт клиникаси директори, Россия Федерацияси бош пульмонологи, тиббиёт фанлари доктори, академик Сергей Николаевич Авдеев ҳамда мазкур олийгох доценти, фан номзоди Галия Нуралиеванинг "Оғир COVID-19 билан касалланган беморларда виброакустик терапия", "Ўткир нафас етишмовчилиги ва сурункали нафас етишмовчилигида юқори оқимли кислород терапияси", "Ўткир нафас етишмовчилиги ва сурункали нафас етишмовчилигида ноинвазив ўпка вентиляцияси" мавзуларидаги маърузаларини тинглаб, саволларига жавоб олдилар.
Маҳорат дарсларининг амалий қисмида Қозоғистон Республикаси Остона шаҳридаги 1-кўп тармоқли касалхона анестезиолог-реаниматологи, тиббиёт фанлари номзоди Александр Воробьев симуляцион қурилмалар воситасида бажариладиган виброакустик терапия муолажа усулларини батафсил кўрсатиб берди.
Муҳаммаджон ОБИЛОВ,
"Шифокор ва ҳаёт" газетаси мухбири.
