Республика шошилинч тиббий ёрдам илмий маркази Наманган филиалининг Тўрақўрғон тумани тиббиёт бирлашмасидаги бўлими жамоаси 100 дан зиёд врач, ҳамшира ва бошқа ходимлардан иборат. Улар беморларга кеча-кундуз беминнат хизмат қилишмоқда. Бўлим бошлиғи Алишер Иброҳимовнинг ўзи, аввало, олий тоифали жарроҳ сифатида ҳамиша ҳамкасбларига шахсий намуна кўрсатмоқда. Айни вақтда кўп сонли жамоадошларининг бор билим ва малакасини ягона мақсад сари йўналтириш борасидаги оқилона ҳаракати билан ҳам яхши натижаларга эришилишини изчил таъминлаб келмоқда.
– Бир неча йилдан буён буйрак-тош касаллигидан қийналиб юрган эдим, шошилинч тиббий ёрдам бўлимига оғир аҳволда келтирилганимда бу ердаги меҳрибон шифокорлар зудлик билан жонимга оро киритишди, икки ярим соат ичида жарроҳлар қаттиқ оғриқ бераётган тошни олиб ташлашди, ҳозир соғу саломат ишимни давом эттиряпман, – дейди миннатдор оҳангда тўрақўрғонлик Қаноатхон Усмонова.
– Қовуғимга сетка қўйишди-ю, азобдан қутулдим. Шифокорларнинг қўли жудаям енгил экан, – дея улардан мамнунлик изҳорлайди қумидонлик Аҳмаджон Аҳмадалиев.
Худди шундай эътирофларни Ўктамхон Эргашева, Раҳмонберди Раҳимов кабилардан ҳам эшитдик. Улар врачларга ҳам, ҳамшираларга ҳам олқишлар ёғдиришди. Бўлим бошлиғи Алишер Иброҳимов бундай мақтовлардан ўзини ўнғайсиз сезадиган, камтар ва камсуқим мутахассис экан. Дарров гапни жамоасидаги ишчан ҳамкасбларига, керакли пайтда ёрдамини аямаётган юқори раҳбарларига бурди.
– Хизматимиз элга манзур бўлишида бўлимимизда тезкор ташхислаш ва даво муолажалари учун зарур шарт-шароитлар муҳайё, – дейди у кейинги йиллардаги ўзгаришларга ишора қилиб. – Кенг, ёруғ ва шинам хоналарда энг зарур тиббий аппаратлар, асбоб-анжомлар мавжуд. Шундай ҳолатда сира ёмон ишлашимиз мумкин эмас, деб ҳисоблаймиз. Шахсан, биз жарроҳларга РШТЁИМ Наманган филиали бош хирурги Адҳамжон Рўзиматовнинг илмий-малакавий кўмаклари катта бўлмоқда. Туман тиббиёт бирлашмаси бошлиғи вазифасини бажарувчи Шокиржон Юсуповнинг бўлимимиз фаолиятини янада яхшилаш учун астойдил қайғураётганлари ҳам бугунги ютуқларимиздан асло қониқмаслигимиз лозимлигини англатмоқда. Жамоамиз билан доимо юксак талабларга муносиб иш юритишга масъулмиз ва бурчлимиз.
Дарҳақиқат, бу сўздагина эмас, амалда ҳам муттасил сезилиб турибди. Энди иш жараёнига нигоҳ ташлаймиз. Бўлим биноси фоесида кузатар эканмиз, уч хил ҳолатга назаримиз тушди. Қабулхонага бемор "103" машинасида, яна кимнидир яқинлари ёрдамида, бундан ташқари кутилмаган фавқулодда ҳолат рўй берган жойдан шикастланган кишилар олиб келинди. Оқ халатлилар илдам ҳаракатлар билан уларнинг аҳволини назоратдан ўтказишмоқда. Кимнингдир қон босими ўлчаняпти, кимнингдир юраги ЭКГ қилиняпти, кимнингдир жароҳати боғланяпти. Дам терапевт, дам кардиолог, дам хирург, дам педиатр қабулхонаю, муолажахонага кириб-чиқмоқда. Ҳамма ўз юмушининг устаси. Беморлар келди-кеттиси ҳам тинмайди.
Қабулхонада бирор лаҳза тиним йўқ. Тиббий ёрдамга муҳтожлар зудликда яшил, сариқ ва қизил тоифаларга ажратилмоқда. Яъни ўзини-ўзи бошқара оладиган, умумий ҳолати қониқарлилар – яшил, ўзини-ўзи бошқара олиши чекланганлар – сариқ, ҳаёти хавф остида қолаётганлар – қизилга сараланиб, уч ёққа йўналтирилмоқда. Биринчиси – мутахассис кўригига ўтказиляпти, иккинчиси лаборатория томон олиб кетиляпти, учинчиси – ўша заҳоти кардиомониторга уланмоқда, дифибляторда юраги массаж қилинмоқда, ҳатто кислород баллонига уланмоқда. Ниҳоят шошилинч операция столига ўтказиляпти...
Хуллас, касал инсонлар ҳолатига қараб, шошилинч чоралар кўрилмоқда. Баъзиларнинг аҳволи бир-икки соатда, баъзилариники ўн икки соатда, баъзилариники бир суткада ўнгланади. Операция қилинганлар эса реанимациядан сўнг стационар бўлимга кузатиб қўйилади. Энг масъулиятли, энг нозик, энг мураккаб вазифа шошилинч тиббий ёрдамчилар зиммасига юкланганини энди-энди ҳис қилган бўлсангиз, ажаб эмас.
Шу ўринда бўлимнинг илғор заҳматкашлари номларини тилга олиб ўтамиз: Нажмиддин Сайфиддинов, Муҳаммаджон Турдибоев, Абдулазиз Баҳриддинов, Эркинжон Жамолов, Саодат Мансурова, Моҳира Дадахонова, Жаҳонгир Бойбобоев сингари врачлар, яъни устозу шогирдлар ёнма-ён беморларни турли касаллик хуружларидан қутқарувчи фидойилардир. Улар қабулхонада ҳам, жарроҳлик столи устида ҳам, лапароскопик амалиётларда ҳам ҳозиру нозирлар.
Врачларнинг ёрдамчилари – ҳамширалар устозлари, катта ҳамшира Равшаной Ражабованинг кўрсатмалари асосида елиб-югуриб, беморларга қарашади, ғамхўрлик қилишади. Қабулхонада Соҳиба Аҳмедова, Муниса Қудратова, Умида Сиддиқова, болаларга Наргиза Алиева, шикастланганларга Саида Ҳасанова, жарроҳлик амалиётига ётганларга Азиза Жабборова, Нафиса Мамадалиева, Дилафрўз Рустамова, Ҳамида Жамоловалар хизмат кўрсатишади.
Кичик тиббиёт ходимлари – Султонпошша Каримова, Муқаддам Бозорова, Ойдин Матбобоева, Машҳура Қодирова ва Нуржаҳон Набижоновалар ҳам уззу-кун фаол ҳаракатдалар.
Бўлимда кунига 250-350 нафар киши шошилинч тиббий ёрдам олади. 2024 йил якунларига кўра, уларга 46 минг 738 киши мурожаат қилибди. Шундан, 18 минг 992 нафари стационар даволанган. 27 минг 746 нафари дастлабки ёрдамдан сўнг амбулатория муассасасига йўналтирилган. Яна рақамлар сўзлайди: 996 нафар беморда оператив, 122 нафарида юқори технологик жарроҳлик амалиётлари муваффақиятли ва сифатли бажарилган.
Ўйлаб кўрсак, улар минг-минглаб беморларни соғайтириб, оилалари бағрига қайтаришган, бир талай инсонлар ҳаётини сақлаб қолишган ва алал оқибат "Раҳмат!" миллионерларига айланиб улгуришган. Биз ҳам:
Барчалари чечану чаққон
Хизматлари халққа ёққан, -
шошилинч шифо бўлими соҳибу соҳибаларига бундан буён ҳам ҳамиша ҳалоллик ва фаолликлари бардавом бўлишини тилаб қоламиз.
Содиқ САЙҲУН,
Ўзбекистон Ёзувчилар уюшмаси аъзоси.
