Барчамизга маълумки, шу йил 7 февраль куни Ўзбекистон Республикаси Президенти Шавкат Мирзиёев "Ўзбекистон-2030" стратегиясини "Атроф-муҳитни асраш ва "яшил иқтисодиёт" йилида амалга оширишга оид давлат дастури тўғрисида"ги Фармонига имзо чекди. Ушбу Фармондан кўзга тутилган мақсад "Ўзбекистон-2030" стратегияси ва Олий Мажлис палаталарининг мажлисларида белгиланган вазифаларнинг ижросини оғишмай ташкил этиш, Бирлашган Миллатлар Ташкилотининг Иқлим ўзгариши тўғрисида ҳадли конвенциясининг Киото протоколи ва Париж битими доирасидаги мамлакатнинг глобал ҳамжамият олдида олган мажбуриятларини бажаришда тармоқ ва соҳаларнинг уйғун "яшил трансформация"сини амалга ошириш, уларнинг рақобатбардошлиги ва ресурс тежамкорлигини таъминлаш, иқлим ўзгариши оқибатларини юмшатиш ва унга мослашиш ҳамда аҳолининг яшаш сифатини яхшилаш ва иқтисодий ўсишнинг "яшил ривожланиш" моделига ўтишдан иборатдир.
Давлат дастурида ҳаётимизнинг ҳамма жиҳатлари қамраб олинган. Тиббиётга дахлдор вазифалар ҳам аниқ ва лўнда белгилаб қўйилган. Фармон билан тасдиқланган давлат дастурининг 6-бандида қайд этилгани каби 2025 йилда аҳолининг саломатлигини яхшилаш, экологик турмуш тарзини шакллантириш ва инсон салоҳиятини рўёбга чиқариш борасида зарур шарт-шароитлар яратиш учун фаол иш олиб борилади. Яъни "Бир миллион яшил оила" умуммиллий ҳаракати йўлга қўйилади. Соғлом турмуш тарзи, тиббий маданиятни ошириш, соғлом овқатланиш, кунлик юриш ва югуриш тарғиботи кучайтирилади. "Яшил транспортда", шу жумладан, велосипедда ҳаракатланиш рағбатлантирилади. Пластик маҳсулотлардан фойдаланиш камайтирилади. Озиқ-овқат исрофгарчилигининг олди олинади. Чиқиндиларни турларига қараб саралаш йўлга қўйилади.
Шунингдек, тиббиётнинг бирламчи бўғинида трансформация босқичма-босқич амалга оширилади. Янаям аниқроқ айтганда оилавий поликлиникалар, оилавий шифокорлик пунктлари ва маҳалла тиббиёт пунктларида аҳолига бирламчи тиббий-санитария ёрдами кўрсатиш самарадорлигига эришилади.
Кўп тармоқли марказий поликлиникалар фаолияти марказий шифохоналарнинг маслаҳат-диагностика поликлиникаси сифатида йўлга қўйилади.
Бундан ташқари марказлашган лабораториялар ташкил этиш, шифокор қабулига навбатни тўлиқ электрон шаклга ўтказиш, шунингдек, давлат томонидан санитария-гигиена нормаларига риоя этилиши устидан назорат кучайтирилгани ҳолда стоматология хизмати аутсорсинг асосида хусусий секторга берилади.
Тиббиёт ходимларининг малакасини ошириш, уларнинг меҳнат самарадорлигини баҳолаш кўрсаткичлари ишлаб чиқилиб, самарадорликка эришган ходимларнинг ойлик маошларига қўшимча устама жорий этилади.
Вилоят даражасидаги ихтисослаштирилган тиббий ёрдам кўрсатувчи тиббиёт муассасаларини зарур ўрин-жой (койка)ларни яратган ҳолда бошқарув, молия ва ташкилий жиҳатдан замонавий кўп тармоқли клиникалар шаклида қайта ташкил қилиш чора-тадбирлари кўрилади.
Демак, давлат дастурига мувофиқ олиб бориладиган кенг кўламли ишлар халқимизнинг соғу саломат яшашига, унумли меҳнат қилишини таъминлашда муҳим қадам бўлади.
