Ўзбекистон Республикаси Президенти маслаҳатчисининг ўринбосари бошчилигидаги Ишчи гуруҳ Наманган вилоятида ижтимоий-иқтисодий ислоҳотларнинг амалга оширилиши, аҳоли муаммолари ва бандликни таъминлаш, камбағалликни қисқартириш, миграциядагилар билан манзилли ишлаш бўйича ўрганишлар олиб борди.
Шунингдек, шаҳар ва туманларда аҳоли учун сайёр қабуллар ўтказилди. Ана шу тадбирларнинг бири Ўзбекистон мудофаасига кўмаклашувчи "Ватанпарвар" ташкилоти вилоят кенгаши маросимлар масканида уюштирилди. Унга Наманган шаҳри, Давлатобод ва Янги Наманган туманлари фуқаролари таклиф этилди.
Ишчи гуруҳнинг ижтимоий-иқтисодий соҳалар бўйича вакиллари вилоят ташкилотлари мутасаддилари ҳамкорлигида фуқаролар мурожаатларини тинглаб, ечимлари юзасидан чора-тадбирлар белгиладилар.
– Фарзандим оғир дардга чалинган. Уни даволатиш учун ёрдам сўраб келдим. Соғлиқни сақлаш вазирлиги вакили муаммони ҳал қилди. Болам пойтахтдаги клиникада имтиёзли равишда соғломлаштириладиган бўлди. Бунинг учун давлатимиздан чексиз миннатдорман, – дейди Шоҳиста Мадаминова.
Дарҳақиқат, Ўзбекистон Республикаси Соғлиқни сақлаш вазирлигининг масъул ходими Умрбек Мусаев, вилоят соғлиқни сақлаш бошқармаси бошлиғининг биринчи ўринбосари Аъзамжон Ботиров, Наманган шаҳар тиббиёт бирлашмаси бошлиғи Шокиржон Ҳайдаров, етакчи мутахассислар сайёр қабулга ташриф буюрган юртдошларимизнинг саломатликларини тиклашга оид мурожаатларини тинглаб, ўрнида ижобий ҳал этдилар.
