"2025 йил – касаба уюшма ташкилотларида ҳисобот-сайлов йиғилишлари йили" деб эълон қилинган. Наманган вилоятида ана шундай анжуманлар бошланди. Тўрақўрғон тумани тиббиёт бирлашмаси касаба уюшма қўмитасининг конференцияси чақирилди. Унга фақат 47 нафар делегатларгина эмас, шаҳар ва барча туманлар тиббиёт бирлашмалари касаба уюшма қўмиталарининг раислари ҳам кузатувчи сифатида таклиф этилдилар.
Конференцияни Ўзбекистон Соғлиқни сақлаш ходимлари касаба уюшмаси республика Кенгаши раиси Фарҳоджон Ҳанапияев кириш сўзи билан очди ва бошқарди.
Кун тартибидаги масалалар юзасидан Тўрақўрғон ТТБ бошлиғи Шокиржон Юсупов, КУҚ раиси Шаҳноза Кимёназароваларнинг маърузалари тингланди. Улар "Бирлашма ва касаба уюшма қўмитаси ўртасида 2023-2025 йиллар учун тузилган Жамоа шартномасининг 2024 йилда бажарилиши юзасидан ҳисобот"лар беришди. Сўнгра КУҚ раиси "Касаба уюшма қўмитасининг 2020 йил февралидан 2025 йил февралигача бўлган давр мобайнидаги фаолият якунлари ва навбатдаги устувор вазифалар тўғрисида" ҳам маъруза қилди.
Тафтиш комиссиясининг ҳисоботи ҳақида Зулфия Зокированинг маърузаси эшитилди.
Делегатлар томонидан қўмита ва унинг раиси фаолияти қониқарли баҳоланди. Чунки, музокарада сўзга чиққанлар мамнуният билан шундай фикрлар билдиришди.
Бу галги сайловлар чинакамига демократик вазиятда ўтказилмоқда. Бюллетенга раисликка номзодлари киритилганлар учун ёпиқ-яширин усулда овоз берилди. Саноқ комиссияси хулосасига кўра, кўпчилик томонидан ёқланган номзод – Шаҳноза Кимёназарова яна КУҚ раиси этиб сайланди. Шунингдек, конференцияда тармоқ касаба уюшмалари вилоят кенгашининг навбатдаги ҳисобот-сайлов конференциясига делегатлар ҳам кўрсатилди.
Ўзбекистон Соғлиқни сақлаш ходимлари касаба уюшмаси вилоят кенгаши раиси Аббосхон Мамадалиев конференция якунида янги сайланганларга муваффақиятлар тилаш билан бирга кўргазмали йиғилиш асосида барча ТТБларнинг касаба уюшмалари қўмиталарида ҳисобот-сайлов конференцияларини пухта тайёргарлик билан юқори савияда ўтказиш юзасидан яна бир бор тавсия ва йўл-йўриқлар берди.
Содиқ САЙҲУН.
