Ўзбекистон Республикаси Президентининг 2020 йил 12 ноябрдаги "Бирламчи тиббий-санитария ёрдами муассасалари фаолиятига мутлақо янги механизмларни жорий қилиш ва соғлиқни сақлаш тизимида олиб борилаётган ислоҳотлар самарадорлигини янада ошириш чора-тадбирлари тўғрисида"ги ПФ-6110-сонли Фармонига биноан жорий йил 14-15 февраль кунлари Наманган шаҳар КТМПда "Бош ҳамширалар мактаби"нинг навбатдаги семинар машғулоти бўлиб ўтди.
Дастлаб вилоят соғлиқни сақлаш бошқармаси бошлиғининг ўринбосари Васила Тожибоева тизимда амалга оширилаётган ислоҳотларда ҳамшираларнинг роли, "Ўзбекистон-2030" стратегиясида белгиланган устувор вазифалар, давлатимиз раҳбарининг "Аёллар орасида онкологик касалликларни назорат қилиш тизимини такомиллаштириш чора-тадбирлари тўғрисида"ги ПҚ-402-сонли қарори ижросини жойларда таъминлаш йўл-йўриқлари ҳақида сўз юритди.
Сўнгра ҳамширалик иши бўйича бошқарма бош мутахассиси Райҳона Мансурованинг бирламчи тиббий-санитария ёрдами тизимида оналар ва болалар билан ишлаш бўйича патронаж ҳамширалар фаолиятини ташкил этиш, универсал-прогрессив моделни татбиқ қилиш, тиббиёт ходимларининг кийиниш маданияти, тиббий деонтологияси тўғрисидаги маърузаси тингланди.
Ўқув дастурига биноан таклиф қилинган мутахассислар соҳада ишловчиларнинг меҳнатини муҳофаза қилиш ва меҳнат хавфсизлиги, эмлаш жараёнларига қўйиладиган талаблар, аёллар орасида онкологик касалликларни назорат қилишда тиббий бригада ва патронаж доянинг роли, шифохона ичи инфекцияларининг олдини олиш, дори воситаларини тасарруф этишнинг меъёрий ҳужжатларини юритиш каби долзарб мавзуларда маъруза қилдилар.
Икки кунлик ўқув семинарида олинган назарий сабоқлар асосида Наманган шаҳар кўп тармоқли марказий поликлиникасида амалиётлар ўтказилди.
