Чуст. Ёрқишлоқдан келаётган енгил автомашина уччироқнинг яшили ёнгач, "газ" берди-ю, "қизил"да ўқдай учиб чиққан аёл бошқарувидаги "Нексия"га урилди. Шикастланганларнинг энг оғири бир жувон бўлди. "Тез ёрдам" уни марказий шифохона қабулхонасига етказди. Травматолог ҳузурига келтирилганда эса жон таслим қилиб бўлган эди. У жувоннинг ўлганини аниқ билса-да, кўксини ёриб ташлагудек "Қара! Қара!" деган ҳайқириқ тўхташга изн бермасди... Ниҳоят, жасад қорнидаги кўкаришга қараб, тўхталган жойида вужуди зирқираб кетди: "Ҳомиладор-ку?!"
– Хуршида! Фонендоскоп! – деди босиқ, аммо шиддатли овозда. Аёл қоринини "тинглади-ю" ҳайқирди: – Югир! Чақалоққа нафас берадиган аппарати билан Абдурауф тез келсин! Акушерни чақир, туғруқхонага олиб ўтишга улгурмаймиз!
Ҳа, травматолог қоринда тирик ҳомила борлигини жажжи юракчанинг беҳол уришидан сезиб қолганди. Бироқ пульси одатдагидек дақиқасига 120-180 ўртасида эмас, 70 га тушган. Хуршида келгунча 60... Доктор чақалоқ кўз ўнгида сония сайин ўлаётганига энди чидаб туролмади:
– Хуршида! Скальпель!
Боғлов ҳамшираси травматолог айтган ускуналарни бирма-бир узата бошлади. Сунъий нафас аппарати ва ҳамшираси билан ҳозир бўлган анестезиолог-реаниматолог дарров фавқулодда ҳолатга шайланди. Қизлар "бошқа соҳа ҳамширасиман" демасдан, ҳеч иккиланмай, ишонч ва дадиллик билан дояликка киришдилар...
Сониялар йилларга татийдиган заҳматли жараёндан сўнг ўлик она қорнидаги тирик бола чиқариб олинди. Оний лаҳзалар туманларнинг ҳам оддий травматологи, анестезиологи ва уларнинг ҳамширалари ўзбек шифокори ўз ихтисослигидан ташқари ҳар қандай вазиятда ҳам инсон ҳаётини сақлаб қолиш салоҳиятига эга эканлигини намоён этди.
Неанотологлар дарҳол парваришга олган чақалоқ дуркун камол топмоқда. Унга Шермуҳаммадбек деб исм қўйдилар...
Одатда таҳлика ичида ишини билиб қилаётган одамларнинг кимлиги, вазифаси билан кейин қизиқилади. Шунинг учун қаҳрамонларимизга бошдаёқ тўхтала олмадик. Энди бемалол танишинг.
Ўша травматолог-нейрохирург – Бахтиёр Мирзараупов! У 1986 йилда Чустда туғилган. 2012 йилда Тошкент тиббиёт академиясини тамомлаб, Москва травматология-ортопедия институтида клиник ординатурани ўтаган. Туман КТМПда олти йил ишлаб, нейрохирургия бўйича ўқиб келгандан буён тиббиёт бирлашмаси қабул бўлимининг травматолог-нейрохирурги.
Анестезиолог-реаниматолог эса Абдурауф Соипов. Ўшандоқ чалаўлик чақалоқни нафас олдириб, массаж билан жажжи юракчани ишга солиб юборган Абдурауфнинг иш бошлаганига эндигина икки йил бўлди.
Шу воқеадаги каби шартлар бўйича халқаро танлов ўтказилса, шубҳасиз, ғолибликни эгаллайдиган ҳамшира қизларимиз – Хуршида Маҳмудова, Шаҳноза Нажмиддиновалар тумандаги тиббий таълим муассасасида ўқиб, шу ердаги шифохоналарда тажриба орттиришган.
Ҳа, юртдошларимиз қасамёдига содиқ, юксак билиму маҳорат, журъату жасорат соҳиблари Бахтиёр ҳамда касбдошларининг ўзгача фидойиликларини эшитиб, қалбан раҳмат ва дуолар йўллаётганликлари, улар билан фахрланаётганликлари шубҳасиз. Бу – шифокор учун тенгсиз бахтдир!
Муҳаммаджон ОБИЛОВ,
Ўзбекистон Журналистлар уюшмаси аъзоси.
