Вилоят соғлиқни сақлаш бошқармаси бошлиғи Абдулҳоди Муҳиддинович Иминовнинг

2025 йилда вилоят тиббиёт тизимида амалга ошириладиган муҳим вазифалар юзасидан

М У Р О Ж А А Т И

Қадрли ҳамкасблар, азиз ўрта тиббиёт ходимлари!

Барчага маълумки, кейинги йилларда тиббиётда кечаётган изчил ислоҳотлар кўлами ортмоқда. Бинобарин, "Атроф муҳитни асраш ва "яшил" иқтисодиёт йили"да ҳам олдимизда қатор йўналишлар бўйича ғоят улуғвор вазифалар турибди. Уларни ҳаётга татбиқ этиш ҳар биримиздан янада фаолликни, юксак масъулият ва бурчга садоқатни талаб этади.

I. БИРЛАМЧИ ТИББИЙ-САНИТАРИЯ ХИЗМАТИ ЙЎНАЛИШИ БЎЙИЧА:

– 813 минг 300 нафар 40 ва ундан катта ёшдаги аҳоли юрак қон-томир ва қандли диабет касаллигини эрта аниқлаш мақсадида оммавий скринингдан ўтказилади;

– 1 миллион 55 минг 200 нафар 18-40 ёшдаги аҳоли профилактик кўриклардан ўтказилиб, саломатлик ҳолатлари баҳоланади;

– 147 минг 600 нафар 30-65 ёшдаги аёллар кўкрак бези, 30-50 ёшдаги 130 минг нафар аёллар бачадон бўйни саратони касаллигини эрта бос­қичларда аниқлаш мақсадида скри­нингдан ўтказилади.

II. ОНАЛИК ВА БОЛАЛИКНИ МУҲОФАЗА ҚИЛИШ ЙЎНАЛИШИ БЎЙИЧА:

– 1 миллион 100 минг 200 нафар 18 ёшгача болалар чуқурлаштирилган тиббий кўрикдан ўтказилади;

– 2-10 ёшли 537 минг 200 нафар болаларда гельминтозни, 3-18 ёшли 846 минг нафар болалар онкогематологик касалликларни эрта аниқлаш мақсадида оммавий ва селектив скринингдан ўтказилади;

– 1 миллион 318 минг нафар болалар 13 турдаги вакциналар билан бошқарилувчи юқумли касалликларга қарши эмланади.

Туғиш ёшидаги ва ҳомиладор аёлларга ҳамда болаларга витаминлар, йод ва фолий кислотасини бепул тарқатиш мақсадида:

– 34 минг 784 нафар ёш келин-куёвларни калий йодид препарати билан;

– 38 минг 465 нафар 35 ёшгача туғиш ёшидаги аёлларни темир ва фолий кислотаси препарати билан;

– 115 минг 807 нафар 6-23 ойлик болаларни микронутриент кукуни билан;

– 537 минг 251 нафар 2-10 ёшдаги болалар гельминтоз профилактикаси бўйича махсус текширишдан ўтказилиб, гельминт аниқланган болалар антигельминт препарати билан бепул таъминланади.

Соғлом оналикни таъминлаш, ирсий касалликларнинг олдини олишнинг зарурий чораларини кўриш:

– 34 минг 784 нафар никоҳланувчи шахс­лар тиббий кўрикдан ўтказилади;

– 66 минг 400 нафар ҳомиладорлар перинатал скринингдан ўтказилади;

– 3 та туманлараро перинатал марказнинг самарали фаолияти таъминланади;

– Перинатал хизматни такомиллаштириш лойиҳаси доирасида оналар ва болаларга кўрсатилаётган тиббий хизмат сифатини янада ошириш мақсадида Республика ихтисослаштирилган она ва бола саломатлиги илмий-амалий тиббиёт маркази Наманган филиалига 10 миллион АҚШ доллари миқдорида грант маблағлари жалб этилади.

III. АҲОЛИГА ИХТИСОСЛАШТИРИЛГАН ХИЗМАТ КЎРСАТИШ БЎЙИЧА:

– Сурункали касалликлар билан диспансер назоратидаги 867 минг 310 нафар беморлар амбулатор, стационар (туман) шаҳар, вилоят ва республика даражасида) соғломлаштирилади;

– Барча (туман) шаҳар тиббиёт бирлашмаларида мураккаб лапароскопик жарроҳлик амалиётлари (ошқозон-ичак резекциялари, лапароскопик нефрэктомия, простатэктомия, аденомэктомия, цистэктомия) йўлга қўйилади;

– Республика ихтисослаштирилган илмий-амалий тиббиёт марказлари томонидан 10 та янги юқори технологик ташхислаш ва даволаш усуллари вилоят даражасида ва 4 таси туман даражасида амалиётга жорий қилинади;

– РШТЁИМ Наманган филиалида органлар ва тўқималар трансплантацияси амалиётлари жорий қилинади;

– РИО ва РИАТМ Наманган филиалида Лапароскопик "Чап томонлама гемиколэктомия", "Кўндаланг чамбар ичак резекцияси" опера­циялари мустақил равишда йўлга қўйилади ҳамда "Лапароскопик тўғри ичак экстирпацияси" жарроҳлик амалиёти жорий этилади;

– Наманган вилояти кўп тармоқли тиббиёт марказида буйрак ва жигар трансплантацияси амалиётлари жорий қилинади;

– Вилоят фтизиатрия ва пульмонология маркази томонидан 4 та янги юқори технологик ташхислаш ва даволаш усуллари вилоят даражасида ва 1 таси туман даражасида амалиётга жорий қилинади;

– РИЭИАТМ Наманган филиали мутахассисларининг (врач-эндокринологлар, жарроҳ, реаниматологлар) хорижий мамлакатларда касбий салоҳияти оширилади;

– Республика ихтисослаштирилган эндокринология илмий-амалий тиббиёт маркази Наманган филиали томонидан Учқўрғон, Янгиқўрғон ва Чуст туманларида қалқонсимон без ва қалқонсимон олди безида, буйрак усти безида, ошқозон ости безида, қандли диабет касаллиги бор беморларда юқори технологик жарроҳлик амалиёти йўлга қўйилади.

Шунингдек, вилоят муассасаларини марказлаштириш орқали кўп тармоқли клиникалар ташкил этиш бўйича пухта ўрганилган таклиф ишлаб чиқилиб, тасдиқлашга киритилади. Бунда, бирлаштириш мумкин бўлган муассасалар рўйхати шакллантирилади.

Аҳоли ўртасида соғлом турмуш тарзини, тўғри овқатланишни ташкил этиш бў­йича 8 та йўналишни қамраб олган вазифалар амалга оширилади:

1. Тўғри овқатланиш учун зарур шарт-шароитларни яратиш бўйича услубий тавсиялар ишлаб чиқиб, ҳудудларга электрон шаклда юборилади;

2. Вилоят ва 209 та туманҒшаҳар даражасидаги давлат ташкилотларида ходимларнинг тўғри овқатланиши учун зарур шарт-шароитларни яратиш бўйича услубий тавсиялар амалиётга татбиқ этилади;

3. "5 минг қадам" акцияси ўтказилиб, унга аҳоли кенг жалб қилинади;

4. Катта ёшдаги аҳоли орасида скандинавча юриш ва уларга мос бошқа спорт турларини жорий қилиш, "Кексалик гашти" шиори остида енгил спорт мусобақалари ўтказиб борилади;

5. Ота-оналарга семизликни олдини олишда тушунтириш ишлари бўйича видеороликларни телевидение ва интернет тармоқларида кенг намойиш этиб, тарғибот тадбирлари олиб борилади;

6. Соғлом турмуш тарзи бўйича ижтимоий тармоқларда машҳур блогерлар, соғлом турмуш тарзи элчиларини жалб қилган ҳолда ҳамкорликдаги ишлар йўлга қўйилади;

7. Диний соҳа ходимлари томонидан аҳоли орасида соғлом турмуш тарзи тамойиллари ҳақида маърифий тарғибот ишларини амалга ошириш учун материаллар тақдим этилади;

8. Катта ёшдаги аҳолига овқатланишни назорат қилишда мобиль иловалардан фойдаланиш ўргатилади.

Юқоридаги тадбирлар маҳаллий бюджетдан ажратиладиган 1,7 миллиард сўм маблағ ҳисобига оилавий поликлиника шифокорлари ҳамда маҳалла еттилиги вакиллари иштирокида амалга оширилади.

IV. ТИББИЙ ТАЪЛИМ, МАЛАКА ОШИРИШ ВА КАДРЛАР ТАЪМИНОТИ ЙЎНАЛИШИ БЎЙИЧА:

– Вилоят даволаш-профилактика муассасаларидаги 250,5 ставка вакант шифокор лавозимлари тўлдирилади;

– Вилоятдаги 900 нафар шифокор ва 2850 нафар ўрта тиббиёт ходимларининг республика тиббиёт олийгоҳлари ва марказларида малака ошириши ташкил этилади;

– Тиббиёт бирлашмалари ва вилоят даволаш-профилактика муассасаларининг 30 нафар малакали мутахассисларнинг нуфузли чет эл клиникаларида малака ошириши таъминланади;

– Андижон давлат тиббиёт институти билан ҳамкорликда камида 10 нафар раҳбарнинг илмий даражали бўлишига эришилади.

V. МОДДИЙ-ТЕХНИК БАЗАНИ ТАКОМИЛЛАШТИРИШ БЎЙИЧА:

– Вилоятдаги даволаш-профилактика муассасалари 704 та компьютер техникаси билан таъминланади;

– Халқаро молия институтлари ва хорижий ҳукумат молия ташкилотлари иштирокидаги ло­йиҳалар доирасида Наманган вилоятида жойлашган давлат тиббиёт муассасаларига жами 176 турдаги 1 276 дона 9,3 миллион АҚШ доллари миқдоридаги тиббий жиҳозлар етказиб берилади;

– Учқўрғон тумани тиббиёт бирлашмаси марказий шифохонаси терапия бўлими биноси мукаммал таъмирланиб, 12 турдаги 108 дона қаттиқ ва юмшоқ жиҳозлар билан таъминланади;

– 4 та бирламчи тиббий-санитария ёрдами муассасалари моддий-техник базасини мустаҳкамлаш орқали аҳоли ва ходимларга зарур шарт-шароитлар яратилади. Жумладан, Косонсой туманида Ободон ОШП, болалар КТМП бинолари (2,6 миллиард сўм), Чуст туманда 44-оилавий поликлиника Тепақўрғон филилали биноси (2,5 миллиард сўм), Чортоқ туманида 53-оилавий поликлиника биноси (0,5 миллиард сўм);

– Даволаш-профилактика муассасаларида 181 та санитария-гигиена шохобчалари таъмирланади;

– Вилоят юқумли касалликлар шифохонаси ва унинг бўлимлари таъмирталаб оқава тизимларини таъмирлаш ҳамда марказлаштирилган тизимга улаш чоралари кўрилади;

– Инвестиция дастури доирасида 6 та тиббиёт объектларида (54,3 миллиард сўм) қурилиш-таъмирлаш, жумладан, 1 та янги қурилиш, 5 та реконструкция ишлари олиб борилади;

– Республика тез тиббий ёрдам марказининг Наманган филиали ва Call-марказини аҳолига тезкор хизмат кўрсатиш шарт-шароитларига эга ҳамда халқаро стандартларга мувофиқ жиҳозланган янги бинога кўчириш чоралари кўрилади;

– Аҳолига кўрсатилётган тиббий ёрдам сифатини ошириш, жумладан, юрак ишемик касалликлари асоратларини эрта аниқлашга эришиш учун Республика тез тиббий ёрдам марказининг Наманган филиали Тез тиббий ёрдам бригадалари учун қўшимча замонавий Юкард-100 портатив ЭКГ тиббий аппаратураларидан (сим карталик) сотиб олинади ва Кардиология маркази билан масофавий диагностика йўлга қўйилади.

VI. ХУСУСИЙ ТИББИЁТ ВА ДАВЛАТ-ХУСУСИЙ ШЕРИКЛИК ЛОЙИҲАЛАРИ ҲАМДА ЧЕТ ЭЛ ИНВЕСТИЦИЯЛАРИНИ ЖАЛБ ЭТИШ БЎЙИЧА:

Австрия давлати "АМЕ International" компанияси томонидан "UniCredit Bank Austria AG" банкининг 12,4 миллион АҚШ долларлик кредит маблағлари ҳисобидан 2 та лойиҳа, жумладан, Наманган шаҳрида замонавий гемодиализ маркази ташкил этилади ҳамда Травматология ва ортопедия маркази Наманган филиалида 118 турдаги юқори технологик амалиётлар учун 152 турдаги 342 дона замонавий аппаратлар харид қилиш амалга оширилади;

– Хорижий инвестиция иштирокида 8,6 миллион АҚШ долларлик 2 та хусусий тиббиёт ло­йиҳалар ("Verigrow Diagnostic" ва давлат хусусий шериклик асосидаги туғруқхона) амалга оширилади;

– 36 та янги хусусий тиббиёт муассасалари ташкил қилинади, мавжуд 25 та хусусий тиббиёт муассасаларининг тиббий хизмат тури кенгайтирилади;

– Чортоқ туман тиббиёт бирлашмасидаги самарасиз фаолият юритаётган хўжалик ҳисобидаги неврология бўлимида ДХШ асосида замонавий тиббий диагностика ва даволаш маркази ташкил этилади.

Мазкур йўналишдаги лойиҳалар учун жами 149,28 миллиард сўм сўм ҳамда 115,6 миллион АҚШ доллари сарфланади.

Юқоридагилардан кўриниб турибдики, вилоятимиз соғлиқни сақлаш тизими яқин орада юксалиш сари дадил одимлайди. Бу эса аҳолига кўрсатилаётган тиббий хизмат сифати ва самарадорлигини янада оширишга йўл очади.