Ўзбекистон Республикаси Президентининг 2024 йил 5 сентябрдаги "Давлат тиббий суғуртаси механизмларини жорий этишга оид чора-тадбирлар тўғрисида"ги қарорини бажариш бўйича вилоятимизда фаол иш олиб борилмоқда. Республика Соғлиқни сақлаш вазирининг буйруғига мувофиқ ўтган йилнинг январида id.medhub.uz дастури асосида бирламчи тиббий санитария муассасаларида врачлар ва ўрта тиббий ходимлар қабулига электрон навбатни қайд этиш, беморни қабул қилиш, унинг ягона тиббий картасига касаллик тарихларини ёзиб бориш ҳамда сақланишининг йўлга қўйилгани янги қарор ижросида жуда қўл келмоқда.

Йил якунига кўра вилоят аҳолисининг 90,7 фоизи тиббий ахборот тизими дастурига киритилган. Вилоят соғлиқни сақлаш бошқармасида давлат тиббий суғурта тизимига ўтишга тайёргарликни амалга оширувчи ҳамкорликдаги ишчи гуруҳи ташкилланди. Гуруҳ томонидан даволаш-профилактика муассасалари инвентаризациядан ўтказилди. Маълум бўлдики, уларда 4643 та компьютер жамланмаси мавжуд, яна 2442 та шундай жамланма зарур экан. Келгусида эҳтиёжларга қараб, таъминот тўкислигига эришилади.

Вилоят соғлиқни сақлаш бошқармасида hrm.argos.uz тизими жорий қилинган. "Э-КАДР" тизими 14 та шаҳар ва туманларда, шунинг­дек, 20 дан зиёд вилоят даволаш-профилактика муассасаларида йўлга қўйилган. Бу билан фаолиятдаги ходимлар ҳисобини юритиш ва бир неча ҳисобот шаклларини электрон ҳолда олиш имконияти яратилди. Яна edo.ijro.uz электрон ҳужжат алмашиш жорий қилинди.

Давлат тиббий суғурта механизмларини ташкил этиш учун тайёр­гарлик, тиббий ёрдам ва молия­лаштиришнинг янги усуллари, даволаниб чиққан беморларнинг статистик картаси 066-х/ш янги шаклини юритишга ўтиш жараёнлари бўйича барча муассасаларда семинарлар уюштирдик. Реимбурсация, яъни дори-дармонларни беморга давлат томонидан бепул таъминлашнинг янги тартиби тарғиботига бағишланган семинарлар ҳам ўтказилди. Оилавий шифокорларга зурур тушунчалар берилди. Реимбурсация тизимида қатнашадиган хусусий дорихоналар рўйҳати шакллантирилди.

Ҳозирда Ўзбекистон Республикаси Президентининг 2021 йил 28 июлдаги "Соғлиқни сақлаш соҳасида ихтисослаштирилган тиббий ёрдам кўрсатиш тизимини янада такомиллаштириш чора-тадбирлари тўғрисида"ги қарори ижросига ҳам алоҳида эътибор қаратилмоқда. 2024 йилда Давлат тиббий суғурта жамғармаси маблағлари билан имтиёзли тоифага кирувчи шахсларга ёрдам кўрсатиш учун Республика ихтисослаштирилган кардиология илмий-амалий тиб­биёт маркази Наманган филиалида 2 миллиард 540 миллион сўм маблағ ҳисобига 132 нафар беморда мураккаб юқори техноло­гияли жарроҳлик амалиётлари сифатли уддаланди. Вилоят кўп тармоқли тиббиёт марказида эса 1 миллиард 800 минг сўм маблағ ҳисобига 189 нафар оғир ҳолатдаги бемор жарроҳлик йўли билан соғайтирилди. "Doctor vision" МЧЖда 616 миллион сўм эвазига кўзи касалланган 195 нафар беморда мураккаб операциялар муваффақиятли бажарилди.

Давлат тиббий суғурта тизимида ишлашга жорий йил январидан Намангандаги 18 та вилоят даволаш-профилактика муассасаси ўтмоқда. Бу биринчи босқич бўлиб, келгуси 2026 йилдан шаҳар ва туман тиббиёт бирлашмаларида ҳам янги тизимни жорий этиш бўйича тайёргарлик саъй-ҳаракатлари олиб борилмоқда. Инсонпарвар жамиятимизда аҳолига давлат тиббий суғуртаси асосида беминнат хизмат кўрсатиш, кафолатланади.

Алиёр НУРАЛИЕВ,

Давлат тиббий суғурта жамғармаси Наманган вилоят ҳудудий муассасалар

билан ишлаш бўлими бошлиғи.