РОССИЯ ВА ЎЗБЕКИСТОН КАРДИОХИРУРГЛАРИ ҲАМКОРЛИГИ

Республика ихтисослаштирилган кардиология илмий-амалий тиббиёт маркази Наманган филиали мутахассисларининг хорижлик ҳамкасблари билан ҳамкорлик доираси тобора кенгайиб, изчил ва фаол тусга кирмоқда.

Уч кун давомида меҳмон бўлиб турган Россия Федерацияси Санкт-Петербург шаҳридаги В.А.Алмазов номли Миллий тиббиёт тад­қиқот марказининг эндоваскуляр хирурги, тиббиёт фанлари номзоди Нарек Марукян навбатдаги мураккаб технологик амалиётларни биргаликда бажариб, маҳорат малакасини наманганлик касбдошларига ўргатди. Натижада йигирмадан зиёд нажотталаб хастаҳолларга соғлом ҳаёт ато этилди. Энг эътиборлиси, улар ичида бола беморларнинг борлиги, фақат уларнинг ўзлари эмас, балки ота-оналарининг ҳам ташвишлари қисқа фурсатда кўнгилларидан аритилганидир. Биз палаталарга кирганимизда худди шунинг шоҳиди бўлдик.

– Икки ярим ёшли қизалоғим Омина туғма юрак нуқсонидан озор чекиб келарди, – дейди тўрақўрғонлик Умида Жамолиддинова. – Операция қилдиришга қўрқиб юрардик. Бу қадар ғамхўрлик кўрсатилишини сираям ўйламагандик. Россиялик моҳир мутахассис етакчилигида атиги 30 дақиқа атрофида фарзандимнинг танасига тиғ теккизмасдан, тож томири орқали операцияни амалга оширишди. Амалиёт кеча оқшом уддаланган бўлса, мана бугун эрталаб болажоним ўйноқлаб юрибди. Оиламиз хурсандлигининг яна бир сабаби катта миқдордаги харажат давлат томонидан қоплаб берилганидир. Энди ҳаммаларига мингдан-минг раҳматлар айтсак арзийди.

Яна шу каби миннатдорчиликни учқўрғонлик ўн бир ёшли Шаббонанинг онаси Моҳира Ғайбуллаевадан, уйчилик тўрт ёшли Муҳаммадризонинг онаси Мафтуна Адҳамжоновалардан ҳам эшитдик. Улар фарзандларининг юрак нуқсонлари йўқотилганидан бирам қувонишардики, буни фақат оналаргина яққол тасаввур этишлари мумкин.

Наманган шаҳрида яшовчи йигирма етти ёшли аёл Нозима Неъматхонованинг мижжаларида қалқиган севинч ёшлари ҳар қандай одамни бефарқ қолдирмайди. Чунки, унда ҳам аввалги куни операция ўтказилган, бугун эса аҳволи ўнгланиб, ўзини дунёдаги энг бахтиёр инсондек ҳис этиб турибди.

– Йиллаб азоб чекиб юрдим, тўрт ва икки ёшли фарзандимни ўзим катта қилиб олай деб, операцияни кейинга суриб келаётгандим. Ниҳоят, кўнглимда умид қуёши жилваланди. Тиғсиз, чандиқсиз операция йўлга қўйилганини эшитиб, болаларим бахтига соғайиб кетишимга қатъий ишондим. Янглишмаган эканман. Россиялик Нарек Марукян ва ўзимизнинг врачларимиз – Акмалжон Жалилов, Абдурасул Тўлабоев, Ғиёсиддин Сотиболдиев, Абдурауф Обидов, Аъзамжон Исмоиловлар ёнма-ён туришиб, менга соғлом ҳаёт бағишлашди. Қўллари асло дард кўрмасин шундай уддабурон шифокорларнинг.

Филиал директори, тиббиёт фанлари номзоди Солижон Мўминовнинг айтишича, юрагида туғма нуқсони бор болаларни окклюдер воситасида соғайтирувчи юқори технологияли жарроҳлик амалиётлари кўкрак қафаси очилмасдан, ҳатто наркоз бермасдан беозор ўтказилиши бугунги жаҳон тиббиёти ютуқларидан бири ҳисобланади. Бу жараёнда юракдаги туғма тешикча ёпилади. Маълум муддатдан кейин окклюдер та­биий юрак деворига айланиб кетади. Наманган кардиологлари жамулжамланган мазкур муассасада энг ноёб тиббий аппаратларнинг мавжудлиги, мукаммал малакали мутахассислар улардан самарали фойдаланишаётгани ҳайратона ҳаётий ҳақиқатдир. Шунинг учун ҳам хориж мутахассисларининг қадамлари бу ердан узилмаяпти. Қулай шароит ва қулай имкониятлар шарофати билан қанчадан-қанча беморлар тиғсиз тузатилиб, соғ­ломлар сафига қўшиб юборилмоқда.

Дарвоқе, бугун россиялик мутахассис навбатдаги ташрифини якунласа, эртадан беларуслик кардиохирург унинг ўрнини эгаллайди. Ўзбекис­тонлик ва хорижлик шифокорларни ҳақли равишда бир-бирига устоз, бир-бирига шогирд десак хато эмас. "Ҳамкорликда ҳикмат кўп" деганларидек, меҳмонлар мезбонларга ҳам ўргатишяпти, ҳам улардан ўрганишяпти.

Содиқ САЙҲУН.