ЎЗБЕКИСТОН – БЕЛАРУСЬ КАРДИОХИРУРГЛАРИ ҲАМКОРЛИГИ
– Кейинги йилларда мамлакатимиз ҳамда Беларусь Республикаси ўртасида барча соҳаларда бўлгани каби соғлиқни сақлаш тизимида ҳам изчил ҳамкорлик алоқалари ўрнатилмоқда, – дейди Республика ихтисослаштирилган кардиология илмий-амалий тиббиёт маркази Наманган филиали директори Солижон Мўминов – 2023 йил сўнггида Минск шаҳрида ўтказилган Ўзбекистон-Беларусь тиббиёт форумида қатнашганмиз. Биз ташриф чоғи у ердаги ихтисослаштирилган кардиология илмий-амалий тиббиёт марказида бўлганимизда ўзаро ҳамкорлик меморандумини имзолаганмиз. Келишувлар доирасида борди-келдилар анча фаоллашди. Ўтган ҳафтада ана шу марказ директорининг хирургик ишлар бўйича ўринбосари, Беларусь мамлакати бош кардиожарроҳи Сергей Спиридонов бошчилигидаги мутахассислар гуруҳи меҳмонимиз бўлишди. Улар кардиожарроҳларимиз билан мураккаб технологик амалиётларни очиқ усулда тўла муваффақиятли бажаришди, десам ҳам асло англишмайман. Беморларимизнинг кундан-кун яхшиланиб бораётган ҳолати шундан далолат бермоқда.
Дарҳақиқат, ҳамкорликдаги ҳаракатлар ҳамиша шарофатли якунланадиган кардиомарказда яна бир неча юраги хасталар дарддан халос этилдилар. Аслида бу айтишгагина осон. Биргина катта ёшдаги беморнинг юрак нуқсонини бартараф қилиш учун икки мамлакат жарроҳлари 5 соатдан зиёд тик оёқда туриб, операция ўтказишганининг ўзи ҳар қандай жасоратдан ортиқ бўлса ортиқки, асло кам эмас. Шу вақт ичида бемор юрагидаги 1 та клапан ҳамда қон томири алмаштирилди.
– Биз ўзбек фуқаросининг хаста юраги нуқсонини тузатиб, меъёрий фаолиятини тиклаш учун биргаликда курашишдан чинакамига фахр туйдик. Бу ахир икки халқ дўстлигининг амалдаги ёрқин исботи эмасми?! – дейди беҳад тўлқинланиб Беларусь мутахассиси Иван Романовский.
Содиқ САЙҲУН.
