Ўзбекистон Республикаси Президентининг 2021 йил 25 майдаги "Соғлиқни сақлаш соҳасида ихтисослаштирилган тиббий ёрдам кўрсатиш тизимини янада такомиллаштириш чора-тадбирлари тўғрисида"ги ҳамда 2023 йил 8 сентябрдаги "Оналар ва болалар саломатлигини муҳофаза қилиш, аҳолининг репродуктив саломатлигини мустаҳкамлаш чора-тадбирлари тўғрисида"ги қарорлари ижроси доирасида Республика ихтисослаштирилган она ва бола саломатлиги илмий-амалий тиббиёт маркази давлат муассасаси Наманган филиали мутахассислари хавф гуруҳига кирувчи ҳомиладор аёлларга зарур тиббий ёрдам кўрсатишмоқда.
Хайрли иш Наманган шаҳридаги кўп тармоқли марказий поликлиникада бошланди. Бу ерда энг аввало, барча тиббий жиҳозлар – кушетка, стетоскоп, тонометр, пульсоксиметр, лента, тарозилар шай қилинди. Бирламчи тиббий-санитария ёрдами муассасаларидаги патронаж доялар эса ўз ҳудудидаги соғлиғида муаммоси бор бўлғуси оналарни мутахассислар ҳузурига йўллашди.
Филиал директори Райҳона Даминова, акушер-гинекологлар Фотима Қаюмова, Нилуфар Қаюмова, Шоҳсанам Убайдуллаева, Феруза Жўраева, Мунаввар Рустамовалар ҳомиладорларни қайта чуқурлаштирилган тиббий кўрикдан ўтказиб, уларни соғломлаштириш ишларини ташкиллашмоқда.
Маълумки, соғлом онадан соғлом фарзанд дунёга келади. 23 январга қадар давом этадиган акция кўплаб аёлларнинг оналик бахтига бенуқсон ва бехавотир эришишлари учун айни муддао десак, асло муболаға бўлмайди. Наманган шаҳридан бошланган жараён тез орада вилоятнинг энг олис ҳудудларини ҳам қамраб олади.
Манзура ЭРГАШЕВА
