Абдулҳоди ИМИНОВ,

Наманган вилояти соғлиқни сақлаш бошқармаси бошлиғи.

Эл соғлиғи – юрт бойлиги, дея бежиз айтилмаган. Зеро, инсон учун энг бебаҳо неъмат унинг саломатлигидир. Соғлом халқ, соғ­лом миллатгина улуғ ишларга қодир бўлади.

Давлатимиз раҳбарининг ташаббуслари билан соғлиқни сақлаш тизими фаолиятини тубдан ислоҳ қилиш ва уни халқимиз саломатлигини ишончли муҳофаза этишга қодир соҳага айлантириш борасида кенг қамровли ишлар амалга оширилмоқда.

Кейинги йилларда вилоятимизда аҳолига тиббий хизмат кўрсатиш сифати ва самарадорлигини ошириш устувор вазифага айланди, десак асло муболаға эмас. Дарҳақиқат, фаолиятнинг барча йўналишларида астойдил изланиш ва хизмат кўрсатиш даражасини юксалтириш сари дадил интилиш бормоқда. Бу ўзгаришлар бирламчи тизимдан тортиб, то ихтисослаштирилган тиббий хизматгача бўлган йўналишларни тўлиқ қамраб олгандир.

Соғлиқни сақлашни янги бос­қичга кўтариш, аввало, унинг моддий-техник имкониятлари муттасил равишда ривожлантирилаётганлиги туфайли десак, айни ҳақиқатни айтган бўламиз. Янгиланаётган йилда Инвестиция дас­тури доирасида фойдаланишга топширилган кўплаб тиббиёт объектлари фикримиз далилидир. Вилоят травматология ва ортопедия маркази, 2-вилоят сил касалликлари шифохонаси учун янги бинолар қурилди. Реконс­трук­циядан сўнг қайтадан фаолият кўрсата бошлаган вилоят болалар кўп тармоқли тиббиёт маркази, Наманган шаҳар кўп тармоқли марказий поликлиникаси, Поп, Норин, Учқўрғон, Чортоқ ва бошқа туманлардаги ўнлаб оилавий поликлиника ҳамда оила шифокорлик пунктларида яратилган шароитлар аҳоли саломатлигини мустаҳкамлаш учун беқиёс имкониятлар яратди.

Тиббиётни юксалтириш нафақат унинг моддий-техник имкониятларини равнақ топтиришни, балки тизимни малакали ва билимли мутахассислар билан тўлдиришни ҳам тақозо этади. Шу жиҳатдан шифокор ва ҳамширалар касбий маҳоратини ошириш масаласига ғоят муҳим вазифа сифатида қарамоқдамиз.

Аввало, мамлакатимиз олийгоҳлари олим ва мутахассислари иштирокида ўқувлар ташкил этиш кўлами ортди. Шу билан бирга тиббиёти айниқса ривожланган давлатлардаги соғлиқни сақлаш марказлари билан ҳамкорлик йўлга қўйилгани айни муддао бўлмоқда. Жорий йилнинг ўзида кўплаб шифокорларимиз Беларусь, Озарбайжон, Туркия каби давлатларда тўпланган тажрибаларни ўрганиб қайтдилар. Бу ҳамкорлик Янги йилда янада кенгаяди, албатта.

2025 йилда ҳам эл саломатлигини мустаҳкамлаш, халқимизни тиббиётдан рози қилиш борасидаги хайрли ишлар фаол давом эттирилади. Соҳага илғор иш услублари, янги техника ва технологияларни татбиқ этиш, тиббий хизматни сифат жиҳатидан юксалтириш бош мезонга айлантирилади. Юқори технологик жарроҳлик амалиётларини Наманганда ўтказиш кўлами кенгаяди. Рақамлаштириш жараёнлари тезлаштирилади. Давлат тиббий суғуртаси тизимига ўтишга ҳозирлик тадбирлари янада жадаллашади. Шу билан бирга соғлом турмуш тарзи тар­ғиботи, фуқаролар жисмоний фаоллигини оширишга қаратилган ишларимизни тағин ҳам авж олдириш ниятидамиз.

Йил номидан келиб чиқиб, тиббиёт муассасалари атрофини кўкаламзорлаштириш диққатимиз марказида туради. Атроф-муҳит мусаффолигига эришишга эътибор қаратилиб, ҳудудларни хушҳаво, сўлим ва яшил масканларга айлантирамиз. Бир сўз билан айтганда, соғлиқни сақлашни янги босқичга кўтариш, юртдошларимизга сифатли ва малакали тиббий хизмат кўрсатилишига эришиш борасидаги саъй-ҳаракатларимиз янада равнақ топади.