Йиллар зина мисол юксалар мудом,

Ёшимизга яна қўшиб қўяр ёш.

Олдга боққанича яшайди одам,

Кўнглида умидлар кўтарар қуёш!

Дарҳақиқат, вақт бетўхтов, ҳаёт абадий. Шунинг учун фасллар алмашаверади, йиллар янгиланаверади. Олам ўз қонуниятига бўйсунса, одам ўз мамлакати Конституцияси меъёрлари доирасида ҳаракат қилади. Шундан ҳар иккиси тараққиётда ва янгиланишда. Умр аталмиш бетакрор неъмат сиз билан биздан ҳалол ва фаол яшашни, вақтнинг ҳар дақиқасидан самарали фойдаланишни, ҳаёт ғаниматдан ғаниматлигини ҳамиша унутмасликни тақозо этади. Агар шунинг уддасидан тўла чиқа олсак, ўзимиз учун ҳам, ўзгалар учун ҳам, Ватан тараққиёти учун ҳам нафдор инсонга айланганимиз шу. Кўнг­лимизни янги Ўзбекистоннинг янгича дунёқарашдаги фуқароси бўлишдан фахрланиш туйғулари тўлдиради. Бугун кечагидан, эртага эса бугунгидан кўпроқ ва яхшироқ меҳнат муваффақиятларига эришишга нима етсин.

Жорий йил наманганликлар учун эсда қоларли воқеаларга бой бўлди. Аввало, саноат ва қурилиш соҳасидаги ютуқларни мамнуният билан тилга олишимиз мумкин. Чунки якунланаётган йилда юзлаб ишчи ўринларини яратган тадбиркорлар эришаётган натижалар салмоғи янада ортди. Минглаб оилалар янги турар жойларга, хонадонларга кўчиб ўтди. Наманганнинг Янги Ўзбекистон боғидаги дастлабки бунёдкорлик ҳамда кўкаламзорлаштириш режаларининг бир қисми натижа касб этди. Ахсикент археология парки таркибидаги очиқ осмон остидаги музей қурилиши жадаллаштирилди. Баҳор ва ёз ойларида 63-халқаро анъанавий гуллар фестивалига, кузда халқаро асал фестивалига ҳамюртларимиз мезбонлик қилишди.

Ижтимоий соҳалардаги ўзгаришларнинг кўлами тобора кенгайди. Неча-неча мактаблар, тиббиёт муассасалари қурилди, таъмирланди, замонавий қиёфа касб этди. Спортчиларимиз халқаро олимпиадларнинг чемпионлари, совриндорлари сафларига қўшилишди. "Яшил макон" умуммиллий дас­турида белгиланган вазифаларнинг изчил бажарилишига ёшу кекса, эркагу аёл, раҳбару мутахассислар ўзларининг муносиб ҳиссаларини қўшишмоқда.

Шу йил 26 ноябрь куни Президентимиз Шавкат Мирзиёев Наманган вилоятида инвестиция ва тадбиркорлик муҳитини ривожлантириш, аҳоли фаровонлигини ошириш чора-тадбирлари юзасидан йиғилиш ўтказди. Унда айтилишича, ўтган ўн ойда вилоятда 681 та лойиҳа бажарилиб, 21 мингта иш ўрни яратилган. 21 триллион сўмликдан зиёд маҳсулот ишлаб чиқарилиб, 702 миллион долларлик экспорт қилинган.

Янги йилнинг режалари ҳам аввалдан шакллантирилмоқда. Янги йилда 527 миллион долларлик 182 та янги лойиҳаларни амалга ошириш имкониятлари аниқланди. Булар рўёбга чиқарилса, қанчадан-қанча ҳамюртларимиз ишли бўлишади. Вилоят хал­қи ҳаёти янада фаровонлашади.

"2025 йил – Атроф муҳитни асраш ва "яшил" иқтисодиёт йили" деб номланиши бежиз эмас. "Яшил" иқтисодиёт концепция­сининг мақсади барқарор иқтисодий ўсишни таъминлаш ва инвестициялар фаоллигини ошириш билан бир вақтда атроф-муҳит муҳофазаси ва ижтимоий интеграция сифатини яхшилаш ҳисобланади. Бу табиатга зарар етказмасдан ва келажак авлод учун бар­қарор муҳитни сақлаб қолишга қаратилган иқтисодий тизимни барпо этиш, демакдир.

Қутлуғ айём тобора яқинлашаётган экан, кўнгилларимиз ҳаяжонга тўлиб: Ассалом, 2025 йил! Қадамингга ҳасанот, янги йил! – деймиз беихтиёр ширин орзу умидлар билан.