Бош Қомусимиз қабул қилинганлигининг 32 йиллиги арафасида Наманган вилоятида бир қатор янги объектлар фойдаланишга топширилди.
Жумладан, Мингбулоқ тумани маркази Жомашуй шаҳарчасида жойлашган 2-вилоят сил касалликлари (фтизиатрия) шифохонаси учун янги барпо этилган бино тақдимоти ўтказилди.
Тантанали очилиш маросимида вилоят ҳокими Шавкатжон Абдураззоқов бошчилигида вилоят секторлар раҳбарлари қатнашдилар.
Мазкур шифохона 1973 йилда фаолиятини бошлаган ва вилоят миқёсида хизмат кўрсатади. 2023 йилнинг июнь ойидан бошланган капитал таъмирлаш ишлари 2024 йил декабрь ойида якунланди. 120 ўринли шифохонада 125 нафар ходим ишламоқда, жумладан, 5 нафар врач, 57 нафар ўрта тиббиёт ходими, 43 нафар кичик ва 20 нафар бошқа ходимлар.
Шифохона қурилиши учун 22,6 миллиард сўм маблағ сарфланди. Янги масканда рақамли рентген, замонавий жарроҳлик ускуналари, Гене Хперт МТБ/РИФ аппаратлари ўрнатилган. Бундан ташқари, шифохона ЭКҲ, физиотерапевтик ва лаборатория аппаратлари билан жиҳозланган.
Шунингдек, шифохона 275 миллион сўмлик тиббий жиҳозлар, 210 миллион сўмлик тиббий буюмлар, 670 миллион сўмлик дори-дармонлар ва 970 миллион сўмлик озиқ-овқат маҳсулотлари билан таъминланди.
