дейишди республикамиз ҳудудларидан келган тиббиёт ходимлари

Кейинги йилларда аҳолига тиббий хизмат кўрсатишни янада яхшилашга, касалликларнинг олдини олишда ихтисослаштирилган тиббиёт марказлари илмий салоҳиятидан самарали фойдаланишга устувор аҳамият қаратилмоқда. Бинобарин, Тўрақўрғондаги маданият саройида ўтказилган "Юқумли касалликларнинг долзарб мавзуси"даги тиббиёт анжумани бу борадаги хайрли ишларнинг давоми бўлди.

Илмий-амалий анжуманга мамлакатимиз турли ҳудудларидан 155 нафар, вилоятимиз шаҳар ва туманларидан эса 250 нафар врач-эпидемиолог, вирусолог, фтизиатр, санитария-эпидемиологик осойишталик ва жамоат саломатлиги бўлимлари ҳамда ОИТСга қарши кураш марказлари шифокор ва мутахассислари таклиф этилди.

- Президентимиз томонидан ўтказилган селектор йиғилишларида соғлиқни сақлаш мутасаддилари, ихтисослаштирилган тиббиёт марказлари ва ҳокимликлар зиммасига соҳада олиб борилаётган ислоҳотларни янада жадаллаштириш, мутахассислар билим савиясини ошириш вазифаси қўйилган. Шу боис мазкур илмий-амалий конференция вилоят ҳокимлигининг ташаббуси билан ташкилланган. Мақсад - коронавирус инфекцияси, ОИТС, сил ва вирусли гепатитлар бўйича мавжуд эпидемиологик ҳолатни ўрганиш, юқумли касалликлар профилактикаси ва даволаш борасидаги ишларни янада такомиллаштиришдан иборат, - дейди вилоят ҳокимлиги масъул ходими Раҳмонжон Абдуллаев.

Чунончи, Республика ихтисослаштирилган эпидемиология, микробиология, юқумли ва паразитар касалликлар илмий-амалий тиббиёт маркази вирусология илмий-текшириш институти ходими, тиббиёт фанлари доктори Ривожиддин Жўраев, Республика ихтисослаштирилган фтизиатрия ва пульмонология илмий-амалий тиббиёт маркази ходими, тиббиёт фанлари номзоди Ойдин Мамарасулова, Тошкент тиббиёт академия­си катта ўқитувчиси, доцент Лола Абдуқодировалар юқумли касалликларнинг олдини олиш ва даволаш усуллари бўйича маърузалар ўқишди. Ўзбекистон тиббиётининг ютуқлари, соҳага оид янгиликлар ҳақида маълумот беришди.

- Таниқли тиббиётчи олимларнинг кўп йиллик тадқиқотлари, амалий кўникмалари асосида юқумли касалликларга қарши изчил ва самарали курашиш бўйича йўл-йўриқлар олдик. Билим ва маҳоратимизни янада оширишга муваффақ бўлдик, - дейди Сурхондарё вилояти Сариосиё туманлараро ОИТСга қарши кураш маркази раҳбари Камола Хидирова.

Санитария-эпидемиологик осо­йишталик ва жамоат саломатлиги хизмати профессори Латофат Анварова ўз чиқишида коронавирус инфекцияси жаҳон аҳли саломатлигига қанчалар хавф туғдирганини эслатар экан, пандемия сабоқларини асло унутмаслик лозимлиги, бу ўта маккор юқумли касаллик юртимизда камайгани билан сира ҳам хотиржамликка берилмаслик кераклиги, айрим давлатларда яна касалланиш кўрсаткичлари ўсиб бораётганлигини инобатга олиб, эмлаш ишларини кучайтириш зарурлигини уқтирди.

- Турли касалликлар инсоният саломатлигига, одамлар ҳаётига таҳдид солиб турган ҳозирги мураккаб даврда мазкур анжуман ташкил этилгани жуда ўринлидир. Чунки, шифокорлар билим ва касбий маҳоратини оширмасдан туриб, профилактика ва даволаш ишларини тубдан яхшилаб бўлмайди. Намангандаги анжуман давомида юқумли касалликларга қарши курашувчи мутахассисларнинг назарий билимлари янги тушунчалар билан тўлдирилди. Соҳага оид янгиликлар ва фан ютуқларидан бохабар бўлдик. Тадбир ташкилотчиларига ўз миннатдорчилигимизни билдирамиз, - дейди Фарғона вилояти Учкўприк тумани санитария-эпидемиологик осойишталиги ва жа­моат саломатлиги бўлими эпидемиологи Муқаддас Сотиболдиева.

Республика илмий-амалий анжумани иштирокчилари вилоятимизда ўтган 61-Халқаро гуллар фес­тивалини ҳам кўздан кечиришди.

- Нафосат ва гўзаллик байрами бизда чуқур таассурот уйғотди. Муаттар гуллар оғушидаги мўъжизакор боғни сайр қилиш бағоят ҳайратомуз эди. Биз ҳавас билан энг сара гуллардан харид қилдик. Энди Наманган гулларининг ифори бутун мамлакатга ёйилади. Бугина эмас, қадимий Ахсикент ва Исоқҳон тўра Ибрат ёдгорлик мажмуаси билан танишиш ҳам чексиз фахру ифтихор ато этди. Кўрсатилган иззат-икром учун вилоят ҳокимлигига ўз ташаккуримизни билдирамиз,- дейди Мудофаа вазирлиги ҳарбий госпитали врачи Зокиржон Ўринов.

Республика илмий-анжумани ана шундай ишчанлик руҳида ва унутилмас таассуротлар билан якунланди.

Абдулла ҒОЗИЕВ.