Тўрақўрғон тиббиёт бирлашмаси томонидан меҳнат фахрийлари ва пенсионерларга Хотира ва қадрлаш куни муносабати билан байрам дастурхони ёзилди. Уларни ТТБ бошлиғи вазифасини бажарувчи Адҳамжон Жўраев қутлуғ айём билан табриклаб, эзгу тилаклар изҳор қилди.
Юзга яқин ёши улуғ врач ва ўрта тиббиёт ходимлари ҳамда ишчи-хизматчилар бир-бирлари билан дийдорлашиб, юксак эҳтиром учун миннатдорлик кайфиятини туюшди.
- Сийланган жойида азиздир инсон деганларидек кўнгилларимиз тоғдек кўтарилди, - деди саксон ёшни қоралаган "Ўзбекистон Республикасида хизмат кўрсатган врач" фахрий унвони соҳиби Аҳмаджон ҳожи ота Худойназаров. - Инсон қадри улуғланаётган юртда яшаётганимизга мингдан-минг шукроналар айтамиз.
