9 май куни Косонсой туманида яшовчи Дилрабо Тўйчиева ички ишлар органларига ариза билан келади. Соат 15:30 ларда номаълум шахс Наманган шаҳар Давлатобод тумани Умид МФЙ ҳудудида жойлашган спиртли ичимликлар савдо дўконига қувватлаш учун қўйган нархи 1.200.000 сўмлик "Samsung-J6" русумли уяли телефон аппарати ва дўкон кассасида бўлган 1.500.000 сўм пулларини ўғирлаб кетганлигини маълум қилади ва чора кўришни сўрайди.
Воқеа жойига тергов-тезкор гуруҳ сафида кинолог Нуриддин Эрманбетов ҳам "Рокки" лақабли хизмат ити билан боради. Улар зийраклик билан жиноят содир этган шахс йўналиши бўйича изма - из юришади. Олиб борилган тезкор-қидирув ва суриштирув ҳаракатлари натижасида Нуриддин ва унинг сезгир хизмат итининг шубҳалари асосли чиқади. Жиноятчи тезда қўлга олинади
Ҳикоямиз қаҳрамони ким эканлигини илғагандай бўлдингиз-а. У осойишталик посбони. Унинг оддий иш кунидан кичик бир лавҳа келтирдик, холос.
Вилоят ИИБ ППХ ва ЖТСБ кинология хизмати фаолиятини мувофиқлаштириш бўлими 1-сонли кинология гуруҳи кичик инспектор кинологи, сафдор Н. Эрманбетов 2013 йилдан ҳозирги кунга қадар кинология хизматида фаолият юритиб келмоқда. Хизмат йўналиши бўйича бой иш тажрибасига эга. Кўникмалар ҳосил қилиб, етук мутахассис сифатида шаклланган.
Нуриддин ҳар бир сафдоши сингари раҳбарият томонидан ўтказиладиган кунлик хизматолди йўриқномасида фаол иштирок этади. Ўзига бириктирилган итини доимий равишда хизматга шайлигини таъминлаб, унинг соғлиғига алоҳида эътибор қаратган ҳолда ветеринар кўригидан ўтказиб боради. Дастиёри кўникмаларини мустаҳкамлаш ва қобилиятини ошириш мақсадида амалий машғулотлар олиб боради.
2021 йилнинг ўтган даври мобайнида сафдор Нуриддин Эрманбетов ўзига бириктирилган хизмат ити билан 20 маротаба ижтимоий-сиёсий, оммавий-маданий ва спорт тадбирларига иштирок этиб, жамоат тартибини ва фуқаролар хавфсизлигини таъминлаш борасида жонбозлик кўрсатган. Шунингдек, 3 маротаба ўғирлик ҳамда 1 маротаба гиёҳвандлик моддалар билан боғлиқ жиноятларнинг иссиқ изидан очилишига катта ҳисса қўшди.
Бахтиёр ОЛИМЖОНОВ,
Наманган вилояти ИИБ ППХваЖТСБ
Кинология хизмати бўлинма бошлиғи, сержант.
