Уйчи туман Санитария-эпидемиологик осойишталик маркази томонидан Ўзбекистон Республикаси Президентининг 2020 йил 19 мартда қабул қилинган "Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида"ги фармони ва "Ўзбекистон Республикасида коронавирус инфекцияси кенг тарқалишининг олдини олишга доир қўшимча чора-тадбирлар тўғрисида"ги қарори, Вазирлар Маҳкамасининг 2020 йил 23 мартдаги "Коронавирус инфекцияси тарқалишига қарши қўшимча чора-тадбирлар тўғрисида"ги қарори ижросини таъминлаш борасида кенг кўламда ишлар олиб борилмоқда.
Туманни бошқа ҳудудлар билан боғловчи йўлларда 5 та назорат постлари ташкил этилди. 56 та маҳалла фуқаролар йиғинларига қарашли мавжуд кўча, гузар, ташкилот, муассаса ва 78 мингдан зиёд хонадонларда, нохуш ҳудудлардан келган 2166 нафар фуқаролар билан яшаш жойларида дезинфекторлар томонидан тарғибот, эпидемиологик суриштирув , зарарлантириш ишлари амалга оширилди. Пандемия пайтида фаолият юритаётган тадбиркорлик субъектларида тушунтиришлар ўтказилиб, зарур маслаҳатлар берилмоқда. Фуқаролар кўпроқ мурожаат этадиган савдо, банк, шифохона каби шахобчаларда 2 метрли ижтимоий масофа сақлаш, ниқоб ва антисептик воситалардан фойдаланиш борасида доимий назорат ўрнатилган.
Ҳудудда санитария меъёр ва қоидаларига риоя этиш юзасидан туман СЭОМ, ҳуқуқни муҳофаза этиш идоралари ҳамкорлигида қўшма тадбирлар амалга оширилмоқда. Шу кунгача карантин қоидаларига риоя этмаган, транспортини махсус рухсатномасиз, таъқиқланган вақтда бошқарган 451 нафар фуқарога 546 миллион 394 минг сўмдан зиёд жарима қўлланилди.
Қаерда қонун устувор бўлса кўзланган мақсадга албатта, эришилади. Бу дунё ҳамжамияти томонидан эътироф қилинаётган коронавирусга қарши Ўзбекистон тажрибаси, қўлга киритилаётган натижаларда ҳам ёрқин намоён бўлмоқда. Шундай экан, уйдамисиз, ё рухсат этилган иш жойингизда фаолият олиб бораяпсизми, ҳар қандай ҳолатда ҳам карантин қоидаларига тўла риоя қилинг! Унутманг, ўзини асраганни Оллоҳ асрайди.
Абдумутал НИШОНОВ,
Уйчи туман СЭОМ бош врачи.
