Фан ютуқлари, олимларимиз яратаётган янги технология ва даволаш усулларини амалиётга жорий этиш ғоят долзарб вазифадир. Мингбулоқ туманида жойлашган 2-сил касалликлари шифохонаси жамоаси бу борада астойдил изланмоқда.

Пойтахтимиздаги нуфузли илмий муассасалар билан ҳамкорлик ўрнатилганлиги ижобий самаралар бераётир. Шифохона бош шифокорининг ўринбосари Собиржон Шоматовнинг хабар беришича, ўтган ҳафтада бу йўналиш бў­йича муҳим қадамлар ташланди. Соғлиқни сақлаш вазирлиги Фтизиа­трия ва пульмонология илмий-тад­қиқот институти профессори Прим­қул Назиров ўтказган бемор умуртқа пағонасидаги мураккаб жарроҳлик амалиёти маҳаллий шифокорларда катта қизиқиш уйғотгани бежиз эмас.

Таниқли мутахассиснинг астойдил саъй-ҳаракати туфайли 1994 йилда туғилган уйчилик бемор аёлнинг бир умр ногирон бўлиб қолишининг олди олинди. У "Кўкрак умуртқалари сили спондилитик босқичи фаол кечиши натижасида орқа миянинг оғир даражада эзилиши, пастки параплегия, тос аъзолари фаолиятининг бузулиши" ташхиси билан шифохонага ётқизилган эди. Жарроҳлик амалиёти муваффиятли якунланди.

Амалиёт сўнггида малакали жарроҳ шифохона врачларига "Кўкрак умуртқалари эконом резекцияси, орқа мия декомпрес­сияси ва комбинирланган спондилодезлаш" мавзусида "Маҳорат дарси"ни ҳам ўтди.

Профессор шу куни вилоятимизнинг турли ҳудудларидан келган беморларни тиббий кўрикдан ўтказиб, уларни соғайтириш бў­йича маслаҳат ва тавсиялар берди.