Шу ҳафтада Косонсой туманида ташкилланган тиббий тадбир бу соҳада қўйилган муҳим қадам бўлди. Олис қишлоқларда туғиш ёшидаги аёллар, ўсмир қизлар ва болаларни соғломлаштириш бўйича иш олиб борилди.
Саломатлик ҳафталигида Республика Ихтисослаштирилган Акушерлик ва гинекология илмий- амалий тиббиёт маркази ва бошқа муасасаларнинг тажрибали шифокорлари вилоятимиздаги ҳамкасблари билан ҳамкорликда чуқурлаштирилган тиббий кўрик ўтказишди. Аҳолининг турли қатламлари орасида оилада тиббий маданиятни юксалтириш ва бошқа мавзуларда давра суҳбатлари уюштирилди.
- Ҳафталик доирасида қишлоғимизга малакали тиббиёт ходимлари келишгани айни муддао бўлди, - дейди "Қорасув" ҚВП мудири Акрамжон Раҳимов. - Аҳоли репродуктив саломатлигини янада мустаҳкамлаш имконини берди. Аёллар, кўплаб ўсмир қизлар ва болаларнинг саломатлиги текширилди. Малакали тиббий хизмат кўрсатилди. Аниқланган касалликларни зудлик билан даволаш юзасидан маслаҳатлар берилди.
- Фарзандим Қобулжоннинг соғлиғидан хавотирда эдим. Бугунги кўрик чоғида кўнглим тасикин топди, - дейди Мавлуда Жалилова.
- УТТ текширувидан ўтдим. Биз кексаларга ҳам қулай шароит яратилганидан мамнунмиз,-дейди 80 ёшли онахон Хайринисо Нурматова.
Абдулла ҒОЗИЕВ.
