Муҳтарам Юртбошимиз ташаббуслари билан аҳоли турмуш фаровонлигини ошириш, ҳудудларда юзага келаётган масалаларни жойида ҳал этиш, одамларга қулай шарт-шароитлар яратиш мақсадида амалга оширилаётган хайрли ишлар кўлами тобора кенгайиб бораётир. Ҳудудлардаги ижтимоий-маънавий муҳитни ўрганиш ва аниқланган муаммоларни бартараф этишга кўмаклашиш мақсадида Республика Ишчи гуруҳи маҳалла ва хонадонларда босқичма-босқич фаолият олиб бормоқда.
Бугунги кунда эзгу мақсад йўлидаги саъй-ҳаракатлар Норин туманига кўчган. Турли хизматларнинг вакиллари хонадонма-хонадон кириб, эл дарду ташвишларига қулоқ тутмоқда. Улар сафида соғлиқни сақлаш ходимлари ҳам бор. Саломатлик посбонлари кўчама-кўча юриб патронаж хизматини амалга оширишяпти. Шаҳар ва туманлардан сафарбар этилган тиббий гуруҳлар эса қишлоқлардаги оилавий поликлиникаларда аҳолини чуқурлаштирилган тиббий кўрикдан ўтказмоқда. Вилоят даволаш-профилактика муассасалари мутахассисларидан иборат тиббий бригадалар кўп тармоқли марказий поликлиникасида туман шифокорлари билан ҳамкорликда иш олиб бормоқда. Тиббиёт масканларининг дори-дармонга талаби тўла таъминланган. Фуқароларнинг тиббий-ижтимоий хизматга эҳтиёжи ўрганиб чиқилмоқда. Алоҳида штабда тумандаги барча тиббий фаолият мувофиқлаштирилиб турилибди.
Полвонкўл, Мирсултончек, Дўмар қишлоқларига ташриф буюрган тиббиётчилар гуруҳи хизматидан аҳоли хурсанддир. Республика шошилинч тиббий ёрдам илмий маркази Наманган филиали, вилоят кўп тармоқли тиббиёт маркази, вилоят тери-таносил касалликлари диспансери шифокор ва ҳамширалари бу борада ҳамкасбларига ибрат кўрсатишмоқда.
- Ҳамюртларимизнинг тиббий маданиятини оширишга эса алоҳида урғу берилмоқда, - дейди Жамият саломатлиги ва соғлиқни сақлашни ташкил этиш илмий-тадқиқот институти Наманган вилояти бўлинмаси раҳбари Ирода Мусаева. - Маҳалларда, ўқув юртларида кенг қамровли тарғибот тадбирлари ташкилланяпти. Аҳоли вакилларига соғлом турмуш тарзи ва тўғри овқатланиш ҳақида буклетлар тарқатяпмиз. Зеро, касалликни даволагандан кўра унинг олдини олган афзалдир.
