Ҳар йили 24 март – Бутунжаҳон туберкулёзга қарши кураш куни сифатида дунё бўйлаб мазкур касалликнинг одамлар соғлиғига ҳалокатли таъсири ҳақида жамоатчилик хабардорлигини ошириш мақсадида нишонланади. Кейинги йилларда мамлакатимизда туберкулёз билан касалланишни ва ўлим ҳолатларини камайтириш бўйича қатор ютуқларга эришилган бўлса-да, хасталикнинг дори воситаларига турғун бўлган шаклларини даволаш, унинг олдини олиш бўйича тарғибот янада долзарб бўлиб турибди. Қуйида туберкулёзли цистит ҳақида маълумот берамиз.
Қовуқ (сийдик пуфаги) деворининг туберкулёз микобактерияси билан зарарланиши туберкулёзли цистит касаллиги деб аталади. Бу жараён буйрак ва сийдик найи туберкулёзидан кейин вужудга келади. Қовуқ шиллиқ қаватида қон томирлар инъекцияланади, ўчоқли қизаришлар, мазкур ташхисга хос яралар юзага келади.
Белгилари:
– қовуқда оғриқ, бовул жараёнида ачишиш;
– оз-оз ва тез-тез сийиш ёки сийдик тута олмаслик;
– сийдик тугашида ранги пушти бўлиши;
– сийдик ранги қизара бориши, ниҳоят қон аралашиши;
– қовуқ ҳажми кичрайиши.
Беморда мазкур белгиларнинг бир вақтнинг ўзида биттаси ёки бир нечаси намоён бўлиши мумкин. Ушбу белгилар юзага келган заҳоти одам атрофдагилардан узоқланишга интилади. Ишхонада, уйда, кўчада, меҳмондорчиликда даб-дурустдан бўладиган оғриқ ва бовул ташвишидан қийналади. Уйқиси бузилади. Ҳаёт тарзи ёмонлашади.
Юқоридаги аломатлар содир бўлган шахс мутахассис фтизиоурологга мурожаат қилиши шарт. Зарур таҳлиллар ўтказилади. Қовуқ туберкулёзи аниқланган вақтда ушбу касаллик муолажаси махсус шифохонада амалга оширилади. Касаллик қанча эрта даволанса асорат қолмайди.
Улуғбек АШИРОВ,
вилоят фтизиатрия ва пульмонология маркази
фтизиоурогинекология бўлими врачи.
