Мамлакатимизда ОИВ инфекцияси эпидемик тарқалиб кетишининг олдини олиш мақсадида "Одамнинг иммунитет тан­қислиги вируси келтириб чиқарадиган касаллик (ОИВ инфекцияси) тарқалишига қарши курашиш тўғрисида"ги Ўзбекистон Республикаси Қонуни, Президентимизнинг 2023 йил 20 январдаги ПҚ-14-сонли қарори ҳамда Вазирлар Маҳкамасининг ОИВ инфекциясининг тарқалишига қарши ўтказилаётган тадбирлар самарадорлигини оширишнинг қўшимча чора-тадбирларига оид қарори асосида изчил ва кенг кўламли ишлар амалга оширилмоқда.

Касаллик асосан 3 хил йўл билан юқади:

1. Жинсий алоқа йўли – тартибсиз жинсий ҳаёт кечирувчи шахслар орасида кўпроқ учрайди. Сабаби, вирус аёл ва эркак шахвоний суюқликларида кўп миқдорда учрайди.

2. Парентерал йўл – бу ОИВ инфекциясининг қон орқали юқишидир. Қон орқали гиёҳванд моддаларни инъекция йўли билан қабул қилишда, беморларни даволаш жараёнида зарарсизлантирилмаган асбоб-анжом, шприц ва игналардан фойдаланганда, ОИВ инфекцияси билан зарарланган қон қуйилганда, соч-соқол, маникюр, педикюр ишлари тўлиқ зарарсизлантирилмаган асбобларда бажарилганда юқиши мумкин.

3. Вертикал юқиш йўли – вирус билан касалланган аёлдан ҳомиладорлик даврида ёки туғруқ жараёнида онадан болага ўтади.

Касаллик қуйидаги ҳолларда юқмайди: жароҳатланмаган тери орқали, битта идишда ов­қат ейилганда, қўл бериб кўришганда, қучоқлашганда, сув ҳавзалари ва ҳожатхонадан фойдаланганда, қон сўрувчи ҳашаротлар (чивин,бит, кана ва бошқа) чаққанда, ҳаво орқали мулоқот пайтида.

ОИВ инфекцияси сурункали касаллик. Уни бутунлай даволаш имкони ҳали мавжуд эмас. Шунинг учун бемор умри давомида тиббий ёрдамга муҳтож бўлади. Фақатгина вирусга қарши дори воситалари ёрдамида ОИВни юқтирган одамлар умрини узайтириш мумкин.

Барно ЮСУПОВА,

вилоят ОИТСга қарши кураш маркази

акушер-гинекологи.