Тиббиётчилар сафида ўз бурчини сидқидилдан бажариш билан бирга бадиий сўз орқали ҳам кишилар руҳига қувват ато этаётганлар талайгина. Уларнинг бири Мавлуда Жўраевадир. У 1980 йилда Тошкент фармацевтика институти тахсилини якунлагандан буён соҳа ривожига муносиб ҳисса қўшиб келмоқда. Шу йиллар мобайнида ёзган шеърлари "Дардларимга ошно онажон", "Меҳрибон юрак", "Ажиб сирлар", "Сахий ердан иноат – барчаси шифо ғоят" номли китобларида жам бўлган. Илмий-ижодий фаолияти муносиб баҳоланиб, Ўзбекистон Ёзувчилар уюшмаси ҳамда Турон ёзувчилар уюшмаси аъзолигига қабул қилинган.

ФИДОЙИ ИНСОНЛАР

Юртимизнинг паҳлавонлари,

Мустақиллик бунёдкорлари.

Халқимизнинг мард ўғлонлари,

Ўз юртининг фидойилари.

Кун ҳам, тун ҳам ҳеч ором билмас,

Элин ўйлаб, хотиржам бўлмас.

Юрагига лоқайдлик сиғмас,

Ўз юртининг фидойилари.

Ҳар муҳтожнинг қўлидан тутар,

Ўз дардини буткул унутар.

Ҳар ишидан яхшилик кутар,

Ўз юртининг фидойилари.

Топганингиз бўлсин дуолар,

Эгри қалблар этар иғволар.

Сизга айтгум ҳамду санолар,

Ўз юртининг фидойилари.

Эзгуликнинг мукофоти бор,

Ардоқлайди сизни шу диёр.

Сизга тоза юраклар ҳамкор,

Ўз юртининг фидойилари.

ЮРТ ТИНЧЛИГИ

Юртимиз тинчлиги энг олий неъмат,

Сиҳат-саломатлик – тилло, зеб-зийнат.

Бундан зиёда бахт бўлмаса керак,

Эй азиз инсонлар, бўлинг саломат.

Юрт учун қайғурмоқ инсонга фарздир,

Бу тупроқ биз учун зийнат ҳам зардир.

Авлодларга бус-бутун қолдирмоқ қарздир,

Тинчликнинг қадрига етинг, одамлар.

Юртлар бор, бошидан ташвиши кетмас,

Оқар сувлари йўқ, нони ҳам етмас,

Осмонида учар ажалдайин ўқ,

Туну кундузлари ҳаловати йўқ.

Инсонга совға йўқ тинчликдан ортиқ,

Сиҳат-саломатлик туҳфа, зўр тортиқ.

Нозу неъмат тўла бугун дастурхон,

Юртимда томоша, тўй-ялла ҳар он.

Юртимиз тинчлиги энг олий неъмат...

Мавлуда ЖЎРАЕВА,

доришунос.