Назиржон Давлатов юқори малакали стоматолог шифокор, соғлиқни сақлаш тизими фидойиларидан бири. У бир неча йил ВССБ лицензиялаш ва аккредитациялаш секторининг бош мутахассиси вазифасини ҳалол ва фаол адо этган. Айни вақтда унинг ноёб бадиий истеъдоди ҳам борлиги "Меҳр кўзда" (2020 ) ва яқиндагина нашр қилинган "Умр қадри" (2025) китобларида жамланган шеърларида намоён бўлди. Қуйида нажоткор ва ижодкор қаламига мансуб шеърларни эътиборингизга ҳавола этамиз.

ҚОЛМАСИН

Давра дўстларга тўлсин, яйранг армон қолмасин,

Шод юрайлик барчамиз, ҳасрат ҳеч он қолмасин.

Чин дўстга хос эзгулик, аҳдга вафо-садоқат,

Дўстга жон фидо айла, қалбда пинҳон қолмасин.

Кўзинг кулсин чарақлаб, юргин доим соғ-омон,

Тўй томошо бўлсину, ғамга имкон қолмасин.

Яхши-ёмон кунингда кор келур энг яхши дўст,

Ўлдирса мард ўлдирсин, номардга жон қолмасин.

Ярашгай давру-даврон, чунки озоддир диёр,

Дўстлар қадрини билмас аҳли нодон қолмасин.

Эзгулик учун яша, фидойи бўл Назиржон,

Гул унсин ҳар изингда, ҳеч ким нолон қолмасин.

БАНДАСАН

Бугунги шон-шуҳрат, амалдан

Қувониб керилма, бандасан.

Бойлигинг ҳирс қурган қамалдан

Юзинг бур, берилма, бандасан.

Ниҳол ҳам ниш урар ҳамалдан,

Кўкка кўп чўзилма, бандасан.

Тоғу тош омонмас шамолдан,

Ердан ҳеч узилма, бандасан.

Поклигинг асрагил тамалдан,

Камтар бўл, тўзилма, бандасан.

Ёлғонким хўп ширин асалдан,

Алданиб эзилма, бандасан.

Назирсан илоҳий азалдан,

Иймондан бузилма, бандасан.

УМР ҚАДРИ

Нима бўлса, вақтин кутади,

Битмас иш йўқ, бир кун битади,

Бесабрдан омад кетади,

Ҳар лаҳзаю, ҳар он ғанимат,

Инсон учун инсон ғанимат!

Қисмат асли азалий битик,

Бут нарса йўқ, нимадир кемтик,

Ўйга толма, доим бўл тетик,

Ҳар лаҳзаю, ҳар он ғанимат,

Инсон учун инсон ғанимат!

Гоҳи шодлик, гоҳида ташвиш,

Минг афсуски, эгизак эмиш,

Тугамас иш, келишу кетиш,

Ҳар лаҳзаю, ҳар он ғанимат,

Инсон учун инсон ғанимат!