(Давоми. Бошланиши 3-сонда).

Биламизки, шундан сўнг у кўз очиб, умидсизликдан чекинади, курашга чоғланади. Хожа Аҳрор шаҳзодага ғойибона куч-қувват бағишлайди. Ўша лаҳзада кутилмаганда Қутлуғ Муҳаммад барлос, Бобои Паргарийлар етакчилигидаги 15-20 чоғли Бобурга содиқ нав­карлар ҳовлига кириб келишади. Уларнинг айтишларича, Қутлуғ Муҳаммад Бобур Ахсидан қочиб чиққанида ажрашиб, Андижон сари кетган экан. Унинг тушига ҳам Хожа Убайдуллоҳ кирган ва қувончли башорат қилган: "... Бобур подшоҳ Карнон деган кентдадур, бориб ани олиб келингким, подшоҳлик маснади анга тааллуқ бўлубтур". Буни эшитган шаҳзоданинг ҳайратига-ҳайрат қўшилган, кўнглида эртанги кунга, ғалабага умид туғилган, ишончи мустаҳкамланган.

Фақат шугина эмас. Пирига эътиқоди барқарор ва бардавом бўлгани учун кейинчалик Хожа Аҳрорнинг форсийдаги "Рисолаи волидия"сини туркийга ўгиришга жазм қилган. Бетоблиги чоғида ётиш ўрнига шу эзгу юмуш билан қаттиқ шуғулланган. Қизиғи, таржимага ўтиришининг хосиятини дастлабки куниёқ сеза бошлайди. Таржима қилиш фикри истима тутиб турган кунлари хаёлига бежиз келмаганини англайди: "Одина куни ойнинг йигирма учида ҳарорат баданимда зоҳир бўлди. Андоғким, жумъа намозини масжидда ташвиш била ўтадим, намози пешин эҳтиёжини қилиб, китобхонада бир замондан сўнг машаққат била ўтадим. Индин якшанба куни истималаб, озроқ титрадим. Сешанба куни кечаси сафар ойининг йигирма еттисида Ҳазрат Хожа Убайдуллоҳнинг "Волидия" рисоласини назм қилмоқ хотиримга кечди. Ҳазратнинг руҳига илтижо қилиб, кўнглумга кечурдимким, агар бу манзум ул ҳазратнинг мақбули бўлур. Тангри инояти била, ҳазратнинг ҳимматидин, панжшанба куни ойнинг йигирма тўққузида андаке афсурда бўлди, ўзга бу оризадин халос бўлдум. Шанба куни рабби-ул аввал ойи саккизида рисола сўзларининг назм қилмоғ ихтимомига етти".

Филология фанлари доктори Саидбек Ҳасанов таъкидлаганидек: "Бобурнинг бу таржимаси билан танишар экансиз, унинг жуда гўзал, равон ва содда тилда баён қилинганлигининг гувоҳи бўлибгина қолмай, бу илм уммонидан ўзларингизга зарур бўлган дурдоналарни олиб баҳраманд бўласиз..."

Хожа Аҳрор мазкур рисоласини ўз отасининг илтимосига биноан битган. Шунга мослаб "Волидия", яъни "Оталик рисоласи" деб номлаган. Пиру мурид муносабатларининг бундай хаёлий ва ҳаётий шарофатидан бохабар бўлар эканмиз, икки буюк шахснинг тарихда тутган ўрни ва мав­қеи авлодларга ибратли сабоқ бўлишини ҳам англаймиз.

Дарҳақиқат, Хожа Аҳрор Валийнинг мирзою султонларга кўрсатган инояти, руҳий мадади, нажотбахш марҳамати халқ ва миллат тақдирига жон куйдириши, уларнинг чинакам раҳнамолик мавқе-мартабаси бениҳоя улуғ бўлганлигини бугунги авлодларга яққол англатиб туради.

Содиқ САЙҲУН.

(Давоми келгуси сонда).