Наврўз айёми халқимизнинг азал-азалдан эзгу ишлар қилишга, бунёдкорликка ундайди. Қишдан толиқиб чиққан, ҳаёт ташвишларидан ҳориган кўнгилларда ажиб бир уйғониш рўй беради. Минг йиллар аввал яратилган кўҳна манбаларда ҳам Наврўз тарихи тўғрисида гап кетар экан, бир-биридан ғаройиб афсоналар, ривоятлар эсланади. Зеро, кўҳна мозий давомида халқимиз ўзидан, ўзлигидан асло воз кечмаган. Табаррук миллий айёмини асраб-авайлаган, қадрлаган. Ҳатто таъқибу таҳдидларга қарамай, одамлар орасида уни нишонлашга бўлган хоҳиш-истак сира сўнмаган. Балки кучайгандан-кучайиб бораверган. Бу анъана авлоддан-авлодга ўтиб келаверган.
Айниқса, истиқлол йилларида Наврўз чинакамига қадр-қиммат топди, умумхалқ байрами сифатида кутиб олинишига кенг шароит ва имкониятлар яратиб қўйилди. Ўзбекистон Республикаси Президенти Шавкат Мирзиёевнинг яқинда қабул қилган "2025 йилги Наврўз умумхалқ байрамига тайёргарлик кўриш ва уни ўтказиш тўғрисида"ги қарорида таъкидланганидек: "Шарқона янги йил бошланадиган қутлуғ кун – Наврўзи олам асрлар давомида баҳор, эзгулик, меҳр-оқибат, меҳнат ва бунёдкорлик рамзи сифатида эл-юртимизнинг ижтимоий-маънавий ҳаётида беқиёс ўрин тутиб келмоқда.
Бу мунаввар айём кейинги йилларда Ватанимизда амалга оширилаётган "Инсон қадри учун, инсон бахти учун" деган олижаноб ғояга ҳамоҳанг бўлиб, том маънода умумхалқ байрамига айланди ҳамда мамлакатимизнинг барча шаҳар ва қишлоқларида кенг нишонланмоқда".
Байрам арафасида ҳар бир кўчада, маҳаллада ва қишлоқларда яшариш, янгиланиш яққол кўзга ташланмоқда. Кўча қирғоқларию, хиёбонларга экилган гул ва дарахт кўчатлари, истиқлол, баҳор ва Наврўзни улуғловчи ранг-баранг баннерлар юртимиз аҳлига кўтаринки руҳ, аъло кайфият бахш этмоқда.
Ҳамма жойда "Қадриятларинг боқий бўлсин, Наврўз!" деган бош ғоя асосида умумхалқ сайилларига пухта тараддуд кўрилмоқда. Энг муҳими, Наврўз байрами муқаддас Рамазон ойига тўғри келганлиги учун кекса авлод вакиллари, хусусан, Иккинчи жаҳон уруши қатнашчилари ва меҳнат фронти фахрийларини ҳар томонлама эъзозлашга эътибор кучайтирилмоқда. Кўмакка муҳтож инсонларнинг ҳолидан хабар олинмоқда. Уларга байрам дастурхонлари ҳам ёзилади.
Албатта, қутлуғ айём олдидан "Яшил макон" умуммиллий лойиҳасида белгиланган тадбирлар изчил ўтказилмоқда. Халқимиз ҳашар йўли билан ободонлаштириш ва кўкаламзорлаштириш тадбирларини кунма-кун изчил амалга оширмоқда.
Қадрли тиббиётчилар! Наврўз айёмингиз муборак бўлсин! Кўнглингизни баҳорий кайфият асло тарк этмасин!
