Мактабимизда таълим-тарбия уйғунлигига эришишга доимий эътибор қаратганмиз. Анъанавий навоийхонлик ва бобурхонлик тадбирлари бу борада қимматли тарбиявий аҳамиятга эгалиги учун февраль ойи давомида фаол иш олиб борилди. Мастура Ниёзова, Одилжон Ортиқов, Нодира Асқарова сингари она тили ва адабиёт фани ўқитувчиларининг ташкилотчилиги ва ташаббускорлиги яхши самаралар берди. Уларга психолог Гулбаҳор Йўлдошева, информатика ўқитувчиси Зарифа Қаюмова, кутубхоначи Феруза Юсуповалар ҳамкорлик қилишгани анжуманларнинг янада мазмундор ва таъсирчан чиқишини таъминлади.

Чунончи, сўз мулкининг султони – Алишер Навоий таваллуд кунига бағишлаб ўтказилган тадбиримиз иштирокчиларда бой таассурот қолдирди. Аввало, Навоий асарлари кўргазмаси барчада зўр қизиқиш уйғотди. Адабий кеча меҳмони, шоир Содиқ Сайҳун бобомизнинг болалиги, китобхонлигига доир янги ва қимматли маълумотлардан адабиёт мухлисларини баҳраманд этди. Ўқувчиларимиз эса Навоийнинг ғазал ва рубоийларини ёддан ифодали ўқишди.

Болаларда адабиётга бўлган меҳр-муҳаббатни бундан буён ҳам дарсдан ташқари тадбирлар орқали янада кучайтираверамиз.

Баҳодир БАДРИДДИНОВ,

Тўрақўрғон туманидаги 53-ўрта умумтаълим

мактаби директорининг маънавий-маърифий

ишлар бўйича ўринбосари.