ЁХУД ТУРОН ФАНЛАР АКАДЕМИЯСИНИНГ НАМАНГАНДАГИ ХАЛҚАРО АНЖУМАНИ
Шу йил 4 февраль куни вилоят "Ёшлар марказида"да ўтказилган мазкур тадбирда Ўзбекистонимизнинг таниқли академик олимлари, шоирлар, ёзувчилар, журналистлар ҳамда иқтидорли ёшлар қатнашдилар. "Ахсикент – шарқ машъали" мавзусидаги 1-халқаро илмий-амалий анжуман иштирокчиларини Махпират номидаги Ўрта Осиё халқлари тарихи институти Турон фанлар академиясининг президенти Ҳайдарбек Бобобеков табриклаб, академия томонидан Наманганда Ахсикент тарихи ва археологиясини ўрганиш илмий-тадқиқот институти таъсис этилганини, унинг директорлигига академик Соҳибахон Аъзамова тайинланганини мамнуният билан маълум қилди.
Сўнгра Ўзбекистон Республикаси Вазирлар Маҳкамаси ҳузуридаги Имом Ал-Бухорий халқаро илмий-тадқиқот маркази директори бош маслаҳатчиси, фалсафа фанлари доктори, Турон ФА академиги Бахтиёр Тўраев "Маҳдуми Аъзамнинг конфликтологик методлари", академик Мирмаҳмуд Мирсайдуллаев "Бобур ва Ахсикент", тарих фанлар номзоди Тоҳиржон Қозоқов "Бобурнома"даги географик маълумотлар" мавзуларидаги маърузалари билан чиқишди.
Халқаро Ахборотлаштириш академияси академиги, Абу Райҳон Беруний номидаги Шарқшунослик институти катта илмий ходими, профессор Бахтиёр Каримовнинг "Тарихий ҳақиқатлар ва замонавий имловий муаммолар" мавзусидаги маърузаси ҳам мароқ билан тингланди.
Анжуман меҳмони – Турон ФАнинг Қозоғистондаги вице-президенти Эркин Мўлдабоев эса ўзининг қимматли фикрлари билан илм аҳлларини ҳамкорликдаги изланишларга чақирди.
Турон ФА вице-президенти Раҳмонали Ҳасановнинг академия томонидан олиб борилаётган кенг кўламли илмий тадқиқот ва нашр ишлари хусусидаги мухтасар ахбороти ҳам тингланди.
Шунингдек, академик шоир ва публицист Содиқ Сайҳун ўзининг "Юртимизнинг икки кўҳна номдош ва ёндош шаҳри – Ахсикент ва Ахси" китоби тўғрисида фикр юритиб, бу борада чалкаш маълумотларни ёритишдан кўра, биргаликда муҳим бир тўхтамга келиш мақсадга мувофиқ эканлигини таъкидлаб ўтди.
Ўзбекистон Республикаси Олий Мажлиси Сенати аъзоси Икромхон Нажмиддинов тадқиқотчилар олдида турган вазифаларга барчанинг эътиборини қаратди.
Ўзбекистон Ёзувчилар уюшмаси вилоят бўлими раҳбари, шоир Зиёвиддин Мансуров ахсикентшунос ва ахсишуносларни янги илмий-тадқиқот институтига жалб этган ҳолда фаол иш олиб бориш мақсадга мувофиқлигини айтди.
Турон ФА президенти Ҳайдарбек Бобобеков анжуман охирида академиянинг кўкрак нишонлари ва китоблар жамланмасидан иборат эсдалик совғаларини жамоат ташкилоти раҳбарлари ҳамда фаолларга тантанали суратда топширди. Шунингдек, Соҳибахон Аъзамова МДҲ илмий-тадқиқотлар маркази координатори сифатида марказнинг кўкрак нишонларини ҳам наманганликларга етказди.
Пойтахтдан ташриф буюрган меҳмонлар куннинг иккинчи ярмида Ахсикент ва Ахси ёдгорликларини зиёрат қилишди. Айниқса Ахсидаги музей экспонатларию, қўлёзмалар жамғармаси уларда зўр қизиқиш уйғотди. XIV-XVI асрдаги кўхна Ахси шаҳри бўйича илмий изланишлар зарурлигини алоҳида эътироф этишди.
