Тўрақўрғон Асириддин Ахсикатий, Заҳириддин Муҳаммад Бобур, Мулла Шамс Шавқий, Умрзоқ Ҳолбой ўғли Ҳайратий, Исҳоқхон Ибрат каби буюк алломаларга бешик бўлган, иккита Ўзбекистон Қаҳрамони етишиб чиққан туман сифатида ҳам машҳур. Уларнинг сафига Турон фанлар академияси академиклари – ёзувчи Исоқжон Нишонов ҳамда шоир ва публицист Содиқ Сайҳунлар ҳам муносиб. Шу боис Исҳоқхон Ибрат номли ижод мактабида икки серқирра адибнинг 70 йиллик юбилейлари муносабати билан ижодий кеча ўтказилди.
Тадбирни туман ҳокими Шерали Қосимов табрик сўзи билан бошлаб берди, юбилей соҳибларининг меҳнатларини, кўп йиллик ижодий ишлари ва ютуқларини алоҳида эътироф этиб, уларга совғаларини тақдим этди. Шундан сўнг Республика Маънавият ва маърифат маркази вилоят бўлими раҳбари Мусохон Оппоқов, Ўзбекистон Ёзувчилар уюшмаси вилоят бўлими раҳбари Зиёвиддин Мансуровлар адибларга вилоят ҳокимининг Табрикнома ҳамда совғаларини тантанали суратда топширишди.
Сўнгра даврага Исоқжон Нишонов ҳамда Содиқ Сайҳунларнинг сафдошлари, наманганлик ва андижонлик дўстлари чиқишди. Ўзбекистон Ёзувчилар уюшмаси аъзолари Рустамжон Умматов, Боқий Мирзо, Темурбек Тўрабоев, Дурбек Йўлдошев, Орифжон Мелиев, косонсойлик адабиёт мухлиси Аъзамжон Мамажонов, меҳнат фахрийси Раҳмонберди Раҳимовлар ҳар икки ижодкорни қутлуғ айёмлари билан қизғин ва самимий муборакбод этишди. Шунингдек, "Шифокор ва ҳаёт" газетаси муҳаррири, Турон фанлар академияси академиги Абдулла Ғозиев таҳририят жамоаси номидан ҳар икки ижодкорни қутлади ҳамда уларга эсдалик совғаларини тақдим қилди.
Тадбир якунида ижодкорлар юксак иззат-икром учун ташкилотчиларга ўзларининг миннатдорчиликларини изҳорлашди.
