* * *
Кексага ҳавас-ла боққан ютади,
Ўзини яхшилар ичра тутади.
* * *
Кексаликка етмоқ ғоят катта гап,
Унгача бор имкон, умринг ол безаб.
* * *
Кексаларнинг кўнгли нозикдан нозик,
Меҳр-муҳаббатдир яйратар озиқ.
* * *
Кексаликдир умримизнинг поёни,
Не экканмиз хирмонимиз аёни.
* * *
Кексалар эмасдир асло пучқувват,
Сўнмаган ғайрати тенгсиз куч-қувват.
* * *
Қадр-қиммат кексаликнинг эъзози,
Топа олсак шу умримиз энг сози.
* * *
Ўзингни кўр кексага қараб,
Ҳолини сўр корига яраб.
* * *
Ўткинчидир ёшлик давру давронинг,
Кексаликка пойдевордир ҳар онинг.
* * *
Яхши сўз кексага тенгсиз куч-мадор,
Қалбини қуёшдек яшнатар баҳор.
* * *
Эъзоз топаверсин чиндан кексалар,
Дуолар тинмаса, эл-юрт юксалар.
* * *
Панду насиҳатга чечан кексалар,
Хотиржам тортар халқ ғамин чексалар.
* * *
Кексаларда ҳадсиз ҳаёт сабоғи,
Қанча олсангиз ҳам йўқдир адоғи.
* * *
Кексага меҳрни кам қилманг ҳеч вақт,
Ардоқлаш ғанимат, кўз юмса - кеч вақт.
* * *
Кексайгандай кексайиш ҳам бахт,
Обрў-ҳурмат шунда сенга нақд.
* * *
Отанг бўлса, ортингда тоғинг,
Боғбонсизмас ҳаётинг, боғинг.
* * *
Онанг бўлса, бағринг бутундир,
Бахтинг бекам, умринг бетундир.
* * *
Кексаларнинг доим омонат жони,
Ғаниматдир қадрлашнинг имкони.
* * *
Кекса ҳам боладай меҳрга чанқоқ,
Хира кўзларига нур бўлгин ҳар чоқ.
* * *
Кексанинг титраган қўлин тутган мард,
Дуосини олган кўрмайди ҳеч дард.
* * *
Кексага жой кўрсат, чорла оромга,
Оқибат чироқдир асли оламга.
* * *
Қарагин ҳассага - кексага ҳамроҳ,
Шу жонсиз таёқча бўлмаган гумроҳ.
* * *
Агар чоғлай олсанг ҳар кекса дилин,
Ҳаттоки унутар туғилган йилин.
* * *
Истасанг уй тўрин қолмаслигин бўш,
Кексалар умрига ҳар кун умр қўш.
* * *
Соғлом халқдан аза-мотам нарилар,
Бардам юзга юзлашади қарилар.
* * *
Тинч юртда саноқсиз қўшақариган,
Бевақт жудоликлар бошдан ариган.
* * *
Панду насиҳатдир кексалар дарси,
Ҳаётда асқотар сабоқ бариси.
* * *
Кексани эъзозлаш энг яхши одат,
Топганинг савобу қувонч, саодат.
* * *
Кекса ҳам боладай меҳрга ташна,
Кўнглини ололсанг, бахт сенга ошна.
* * *
Кексанинг қўлида қадрдон асо,
Ҳатто букилса ҳам синмайди асло.
* * *
Отангга ҳассадай келолмасанг кор,
Фарзандман деганинг минг бора бекор.
* * *
Қадрланса ҳар одам -
Нурга тўлади олам.
* * *
Кексалари эъзозланган юрт -
Бағри тўла баракаю қут.
Содиқ САЙҲУН.
