Оилавий бахт қўрғони – эр ва аёл. Уларнинг ўзаро муносабати, ҳурмат-иззати хонадон "об-ҳаво"сини белгилайди. Уларнинг маънавий жиҳатдан бир-бирига мутаносибликка интилиши, сабру қаноатни маҳкам тутиши оилани балолардан асраб, фарзандлар баркамол улғайишларига замин бўлади. Шу боис ота-она оиладаги ўз бурчларини астойдил адо этишга интилишлари муҳимдир. Мустаҳкам ва саодатли оила эр-хотин бир-бирининг яхши ва ёмон жиҳатларига кўникиши, камчиликларини кечириши билан барпо бўлади.

Эзгу урф-одат ва анъаналаримиз, қадриятлардан озиқа олган ўғил-қизларнинг қалби ва онги гўдакликдан ота-онага ҳурмат, эзгуликка интилиш ҳисси билан шаклланиб боради. Муқаддас заминимизда қадимдан миллий урф-одат ва анъаналаримизни ёш авлод онгига сингдиришда, уларни жисмонан баркамол, маънан етук, меҳр-оқибатли инсонлар қилиб тарбиялашда оила муҳим ўрин тутган. Дарҳақиқат, болаларимиз энг улуғ сифатлар бўлмиш ҳалоллик, ростгўйлик, ор-номус, шарм-у ҳаё, меҳр-у оқибат, меҳнатсеварлик, ватанпарварлик каби гўзал фазилатларни, аввало, оилада ўрганади.

Шу боис ҳам Президентимиз раҳнамоликларида оилаларни маънавий-моддий қўллаб-қувватлашга алоҳида ғамхўрлик қилинмоқда. Уларда фаровонликни таъминлаш, ўғил-қизларнинг соғлиғи, илму ҳунар ўрганиши, бўш вақтларини мазмунли ташкил этишгача диққат марказида. Ҳар бир ота-она учун буларга шукроналик, ўғил-қизларини аллома аждодларимизга муносиб, яратувчан халқимизга хос, она-Ватанга муҳаббатли, учинчи Ренессанс пойдеворини яратишга қодир кишилар қилиб камол топтиришлари ҳам қарз, ҳам фарздир.

Дилрабохон ҲАМИДХОНОВА,

Тўрақўрғон тумани ФҲДЁ бўлими 2-тоифали инспектори.