Ҳозирги вақтда ОИВ инфекцияси бутун инсоният ҳаётига таҳдид солаётган юқумли касалликлардан бири бўлиб қолмоқда. Дунё бўйича 35 миллиондан ортиқ шу инфекция билан яшаётган шахслар мавжуд. Кейинги йилларда бундай кўнгилсиз ҳолат вилоятимизда ҳам қайд этилаётганига асло бефарқ қараб бўлмайди.
Ўтказилган таҳлилларга кўра, бугунги кунда касалланишнинг асосий сабабларидан бири ташқи миграция бўлиб қолмоқда.
2023 йилнинг ўтган даврида аниқланган ҳолатларнинг 60-65 фоизи хорижга чиқиб ишлаб келган аҳоли қатламига тўғри келмоқда.
Шундай экан, юртдошларимиздан эҳтиёткорликни унутмаслик, ўз жуфтига ҳамиша содиқлик талаб қилинади. Аслида никоҳдан олдин жуфтликнинг ҳар иккиси тиббий кўрикка келиши шарт. Чунки янги қурилган оила мустаҳкам бўлиши учун келин-куёвларимиз соғлом бўлиши керак. Акс ҳолда, тўйдан сўнг уларнинг бирида ОИВ инфекцияси аниқлангудек бўлса, афсусланишлар, бир-биридан воз кечишлар, ажралишлар келиб чиқади. Айбдор қидириш бошланади. Асл айбдор ҳукумат белгилаб қўйган бепул тиббий кўрикдан тўйдан олдин ўтиш мажбуриятини писанд этмаган турмуш қурувчининг ўзидир.
Юртдошларимизга мурожаат қиламизки, ҳеч ким бизга чет давлатда энг зўр ҳаёт, зўр иш ва бошқаларни кафолатлаб қўймаган. Албатта, ўз оиласи, яқинлари, фарзандлари, ота-онаси бағридан узоқ давлатларга кетиб, турли машаққатлар чекиб, ишлаб пул топиб оиласи, яқинларининг яхши яшаши учун маблағ топиш осонмас. Агар у ердан бедаво дардни илаштириб олиб келсак, фарзандларимиз, турмуш ўртоғимизни умрининг охиригача етадиган изтиробга соламиз.
ОИВ инфекциясини фақатгина тиббиёт ходимлари ёки тиббиёт муассасалари қарши курашиб, енга олмайди. Бу иллатга қарши бутун бир миллат, халқ бир тану бир жон бўлиб курашсаккина енга оламиз. Шуни унутмаслигимиз зарур!
Б. ЮСУПОВА,
Б. РАҲМОНОВ,
Т. РАҲМОНОВ,
вилоят ОИТСга қарши кураш
маркази мутахассислари.
