Ўзбек тили ўзлигимиз англатар,

Фикримизни минг оҳангда янгратар.

* * *

Ўзбек тили - ўзбекнинг фахри,

Бағри лим-лим маънолар наҳри.

* * *

Давлат тили - давлатнинг юзи,

Она каби баланд нуфузи.

* * *

Она тилим - онадек буюк,

Миллат рамзи, ҳар сўзи суюк.

* * *

Миллатни тил бирлаштирар,

Олам билан сирлаштирар.

* * *

Тил сандиғи аслида луғат,

Ичи тўла жавоҳир - лиқ хат.

* * *

Сукутсуяр ҳарфлар-

Сўзда маъно, таърифлар.

* * *

Ҳар товуш тил жарангги,

Сўз таратар оҳангги.

* * *

Қадрласанг тилингни -

Улуғлайсан элингни.

* * *

Она тилим, она сўзим -

Дунёга боқар кўзим.

* * *

Ўз тилимиз қанча билсак кам,

Ўзга тиллар ёрдамчи ҳар дам.

* * *

Яхши сўз - уюштирар,

Ёмон сўз - уриштирар.

* * *

Тонсанг она тилингдан-

Айриласан элингдан.

* * *

Тили софнинг - дили соф,

Буни билмас ноинсоф.

* * *

Эҳтиёт бўл тилингга,

Ёвланмасин дилингга.

* * *

Сўзни сўзла бузмасдан,

Илдизидан узмасдан.

* * *

Унутмагин ўз тилинг,

Бобомерос сўз - тилинг.

* * *

Она тилинг - ўз тилинг,

Болаликдан дўст тилинг.

* * *

Дунёда янграган ўзбекча нутқ -

Юксак минбардаги оламий ютуқ.

* * *

Ўзбек тили - аъло тил,

Сўзлари сермаъно тил.

* * *

Она тилим - бой тилим,

Ёруғ юзли ой тилим.

* * *

Ўзбекчани ким тушунса бесавол,

На бугуни, эртаси ҳам безавол.

* * *

Кўп тил билган соқовланмас сафарда,

Бурролиги қўл келади зафарда.

* * *

Ақлим қайрар она тилим,

Меникидир барча билим.

* * *

Алладай абадий наводир тилим,

Халқимга ҳаётбахш ҳаводир тилим.

* * *

Аллоҳдан бизларга инъом тилимиз -

Навоий бобомга илҳом тилимиз .

* * *

Ким ўрганар тилингни

Дўст тутади элингни.

* * *

Ўзбек тили - миллат овози,

Авжи баланд наво парвози.

* * *

Яхши сўз - дил боғловчи,

Ёмон сўз - дил доғловчи.

* * *

Ўзбегим тилида кўпдир шеваси,

Улар сўз боғининг ҳар-хил меваси.

* * *

Адабий тил - абадий тил.

* * *

Тахтли тил - бахтли тил.

* * *

Тил - миллатнинг юраги.

* * *

Тилин йўқотмаган - элин йўқотмас.

Содиқ САЙҲУН.